Túımebaev OQO halqynyń suraqtaryna tikeleı efırde jaýap berdi

ShYMKENT. QazAqparat  - Ońtústik Qazaqstan oblysynyń ákimi Janseıit Túımebaev oblystyq «Ońtústik»  telearnasynda ótken «Ákim saǵaty» habaryna qatysty. Oblys basshysy eki saǵatqa jýyq ýaqytta turǵyndardyń kókeıkesti saýaldaryna jaýap berdi, dep habarlaıdy  QazAqparat tilshisi.

Tikeleı efır barysynda barlyǵy 1500-ge jýyq saýal kelip tústi. Turǵyndardan suraqtardy qabyldaý úshin baılanystyń barlyq túri qamtyldy. Suraqtar Call-ortalyq, WhatsApp, elektrondy poshta, sondaı-aq tikeleı translıatsııa júrgizgen Ońtústik Qazaqstan oblystyq ákimdiginiń Facebook-tegi resmı paraqshasy arqyly qabyldandy.

Oblys turǵyndary negizinen  jer, baspana alý, jumyssyzdyq, shahardy abattandyrý, turǵyn úı-kommýnaldyq sharýashylyǵy men joldardy jóndeýge qatysty máselelerdi kóterdi. Sondaı-aq aýyl sharýashylyǵyna qatysty saýaldar da kóptep joldandy.  Suraqtardyń 423-i - WhatsApp, 215 - ózge áleýmettik jelilerden, 1287 - Call-ortalyqqa joldandy.

Aıta ketý kerek, «Ońtústik» telearnasynyń efıri kezinde birden jaýap ala almaǵan kórermenderdiń suraqtary tolyq tirkeldi. Olarǵa memlekettik organdar mindetti túrde jaýap beretin bolady. Sondaı-aq, osy joba aıasynda oblys ákimi Janseıit Túımebaevtyń bergen tapsyrmalarynyń oryndalýy ákimdiktegi ınspektorlardyń nazarynda bolady.

Óńir basshysy Elbasy Nursultan Nazarbaevtyń «Bes áleýmettik bastamasynyń» óńirdegi oryndalý barysy men oblystyń áleýmettik-ekonomıkalyq damýy, bilim jáne ǵylym, mádenıet, óner taǵy da basqa salalarda kezdesetin ózekti de, ótkir máselelerdi sheshý joldaryn aıtty. Sondaı-aq baǵdarlama sońynda Ońtústik jurtyn 15 maýsym kúni bastalatyn Oraza aıt merekesimen quttyqtady.