Tutynýshynyń saýattylyǵy taýar sapasynyń artýyna yqpal etedi - Romanovskaıa

ALMATY. QazAqparat - Saýatty tutynýshy taýar men qyzmet sapasynyń artýyna úles qosady. Bul týraly Almatyda Tutynýshylar Ulttyq Lıgasynyń 25 jyldyǵyna qatysty uıymnyń jańa baǵytymen tanystyrǵan atalǵan Lıga prezıdenti Svetlana Romanovskaıa málim etti.

«Biz sotqa deıin jáne sot barysyndaǵy daýlardy sheshýge at salysatyn edik. Normatıvtik baza jasaqtalýǵa da óz úlesimizdi qosyp kelemiz. Endi taýarlar jáne qyzmet naryǵynda órkenıetti qarym-qatynastyń qurylýyna áreket etemiz. ıAǵnı, endi halyqty aqparattandyrýmen aınalysamyz», - degen Romanovskaıa bul saladaǵy negizgi atqarylatyn jumystaryn túsindirip berdi.

«Tutynýshy tańdaý jasaǵanda óte muqııat bolýy kerek. Elbasy Nursultan Nazarbaev Qazaqstan damyǵan 30 eldiń qataryna ený qajettigin aıtty. Bizdiń bıznes básekege qabiletti bolmaı turǵanda álemdik úzdik 30-dyqqa qalaı enemiz? Bıznes qashan básekege qabiletti bolady? Qashan bizde tutynýshy saýatty bolyp, taýar ıa kórsetilgen qyzmet sapasy týraly kásipkermen keri baılanysqa shyǵyp, óz talaptaryn qoıa bilgende básekege qabiletti bolamyz. Osyndaı qadam arqyly tutynýshy ózine qurmet kórsettirip qana qoımaı, kásipkerdiń jaýapkershiligin arttyrady. Saýatty tutynýshy bizdiń ómir sapamyzdyń artaýyna úles qosady dep oılaımyn», - dedi Lıga Prezıdenti.     

Sonymen qatar, ol 2016 jyly Ulttyq tutynýshylar lıgasynda uıym músheleriniń jalpy jınalysy ótip, onda 25 jyldyq qurmetine Lıgaǵa múshelikke ótý jarnasy endi alynbaıtyny týraly sheshim shyǵarylǵanyn aıtty.

Aıta keteıik, Ulttyq tutynýshylar lıgasynda tutynýshylardyń buzylǵan quqyǵyn qalpyna keltirý, quqyq buzylǵanda keltirilgen materıaldyq jáne moraldyq shyǵyndy óteýge kómektesetin «Zańgerlik qorǵaý jáne sotta múddelerdi qorǵaý» baǵdarlamasy júzege asyrylyp keledi.

Lıga mamandary medıatsııa, sot arqyly tutynýshylarǵa 2016 jyly 57 938 870 teńgeniń materıaldyq shyǵyndy qaıtaryp berýge, 25 676 340 teńge maraldyq shyǵynnyń ótelýine yqpal etken.