Tutynýshylardyń quqyqtaryn qorǵaýda shaǵymdardy qabyldaýdyń biryńǵaı júıesi qurylady
Onyń sózine qaraǵanda, zańnamalyq ózgerister «bir tereze» qaǵıdaty boıynsha tutynýshylardyń quqyqtaryn qorǵaý salasynda shaǵymdardy qabyldaýdyń Biryńǵaı aqparattyq júıesin qurýdy eskeredi.
«Búgingi kúni memlekettik organdar men úkimettik emes uıymdar tutynýshylardyń quqyqtaryn qorǵaý salasyndaǵy óz róli men mindetterin árkelki túsinýi oryn alýda. Bul shynaıy statıstıkany qalyptastyrýǵa, osy saladaǵy júıeli problemalardy anyqtaýǵa jáne sheshýge múmkindik bermeıtindigi anyq. Barlyq «tutynýshylar qorǵaýshylaryn» atalǵan aqparattyq júıege shoǵyrlandyrý – shaǵymdardy berý rásimderin ońtaılandyryp, olardy qaraý sapasynyń monıtorıngin jasaýdy qamtamasyz etedi. Sonymen qatar, obektıvti statıstıkany qalyptastyra otyryp, analıtıkalyq eseptilik júıesin engizýge múmkindik beredi», - dedi mınıstr.
Shaǵymdardy taldaý nátıjeleri Tutynýshylardyń quqyqtaryn qorǵaý jónindegi vedomstvoaralyq keńeste qaralatyn bolady. Ol problemalyq quqyqtyq aktilerdi dereý ózgertýge múmkindik beredi jáne memlekettik organdar qabyldaıtyn sheshimderdiń tıimdiligine tıisti baqylaýdy qamtamasyz etedi.
Sonymen qatar B. Sultanov tutynýshylardyń quqyqtaryn qorǵaý salasyndaǵy úkimettik emes uıymdardy qoldaý baǵytyna toqtaldy.
«Atap aıtqanda, memlekettik áleýmettik tapsyrystyń qoldanysy keńeıtiledi. Halyqtyń áleýmettik osal toptaryna quqyqtaryn qorǵaýǵa tegin ókildik qyzmetter kórsetý úshin qoǵamdyq uıymdarǵa memlekettik tapsyrys beriletin bolady. Budan basqa, tutynýshylardyń qoǵamdyq birlestikterine profılaktıkalyq maqsatta qoǵamdyq baqylaýdy júzege asyrý boıynsha quzyreti beriledi. Ony ótkizýdiń tártibi men negizderi reglamenttelgen», - dedi vedomstvo basshysy.
Budan buryn habarlanǵandaı, Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.