Tutynýshylardyń quqyqtaryn qorǵaý jónindegi vedomstvoaralyq keńes qurylady

NUR-SULTAN. QazAqparat - Qazaqstanda tutynýshylardyń shaǵymyn qabyldaýdyń Biryńǵaı aqparattyq júıesi qurylady. Bul týraly QR Parlamenti Senatynyń jalpy otyrysynda tutynýshylardyń quqyqtaryn qorǵaý máseleleri kózdelgen zań jobasyn tanystyrǵan QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Ýákiletti organnyń rólin kúsheıtýde birinshi kezekte tıimdi tásilderdiń biri retinde «bir tereze» qaǵıdaty boıynsha shaǵymdardy qabyldaýdyń Biryńǵaı aqparattyq júıesi usynylady. Mundaı júıeni qurý tutynýshylardyń quqyǵyn qorǵaý boıynsha barlyq sharalardy bir jerde shoǵyrlandyrýǵa, shaǵymdy daıyndaý jáne ony quzyrly organdarǵa joldaý rásimderin jeńildetýge, sondaı-aq, barlyq ótinishter men olardy qaraý nátıjelerin tsıfrlandyrýǵa múmkindik beredi», - dedi «Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» QR Zańynyń jobasyn tanystyrǵan mınıstr.

Baqyt Sultanovtyń atap ótýinshe, tutynýshylarǵa yńǵaıly bolý úshin júıede daýdyń mánine jáne qyzmet kórsetý salasyna baılanysty shaǵymdardyń birqatar úlgilik formalary, sondaı-aq daýlardy qaraıtyn sýbektilerdiń jáne memlekettik organdardyń tizbesi men baılanys aqparattary ornalastyrylady.

«Ekinshi kezekte, Tutynýshylardyń quqyqtaryn qorǵaý jónindegi vedomstvoaralyq keńes qurylatyn bolady, ol osy baǵyttaǵy kóteriletin máselelerdiń máni men mańyzdylyǵyn kúsheıtedi, problemalyq normatıvtik quqyqtyq aktilerdi tez arada ózgertýge múmkindik beredi, memlekettik organdar qabyldaıtyn sheshimderdiń tıimdiligine tıisti baqylaýdy qamtamasyz etedi. Sonymen qatar, ýákiletti organǵa memlekettik baqylaý fýnktsııasy beriledi. Bul tekseris jospardan tys baqylaý sýbektisine barmaı profılaktıkalyq túrde júzege asyrylady», -dedi Baqyt Sultanov.