Tutynýshylar quqyǵy: Jarty jylda 8 myńnan astam shaǵym tústi

NUR-SULTAN. QazAqparat – Tutynýshylar quqyqtarynyń buzylýyna qatysty bıylǵy jarty jylda 8 myńnan astam shaǵym kelip tústi. Bul týraly QR Saýda jáne ıntegratsııa mınıstrligi Tutynýshylardyń quqyqtaryn qorǵaý komıteti tóraǵasynyń mindetin atqarýshy Almas Abjapparov málim etti, dep habarlaıdy QazAqparat tilshisi.

A. Abjapparov tutynýshylar quqyqtarynyń jıi buzylýyna baılanysty ótinishter statıstıkasy jyl saıyn ósip kele jatqanyn atap ótti. Eger 2020 jyldyń 6 aıynda Komıtetke 5,5 myńnan astam azamat júginse, 2021 jyldyń uqsas kezeńinde 8 myńnan astam shaǵym túsken. Bul rette ótinishterdiń ósý qarqyny 144% - dy qurady.

2021 jylǵy 1 qańtardan bastap tutynýshylardyń quqyqtaryn qorǵaýdyń biryńǵaı «e-tutynushy» aqparattyq júıesi engizildi, ol azamattardyń ótinishterin avtomatty túrde qabyldaýǵa, qaraýǵa jáne júıeleýge arnalǵan. Satyp alǵannan keıin azamattar oǵan keri baılanys nemese taýarǵa ári kompanııaǵa shaǵym qaldyra alady. Ótinish mindetti túrde qaralatyn bolady.

«Bul júıe jumysynyń problemasyna toqtalsaq, bıznes sýbetilerin tirkeýdiń eriktiligine baılanysty, olardyń tirkelýge asyqpaýy bolyp otyr», - dedi A. Abjapparov.

Vedomstvo ókili tutynýshylardyń quqyqtaryn qorǵaý salasyndaǵy problemalar jańa zańnamalyq ózgerister engizýdi talap etetinin atap ótti. Osyǵan baılanysty 2021 jyly Komıtet Zańǵa túzetýlerdiń 2-paketin ázirleýge kiristi. Komıtet ázirlegen joba tujyrymdamasy 2021 jylǵy 25 maýsymda tutynýshylardyń quqyqtaryn qorǵaý jónindegi vedomstvoaralyq keńestiń birinshi otyrysynda talqylandy, al 30 maýsymda tujyrymdama Ashyq NQA portalynda talqylaý úshin ornalastyryldy.