Tutynýshy úshin 1 tekshe metr aýyz sý quny 40 teńgeden aspaýy tıis - mınıstr

ASTANA. QazAqparat - Qazaqstanda kent ishindegi jelilermen birge barlyq toptyq sý qubyrlaryn paıdalanatyn Biryńǵaı operator qurylady. Bul týraly búgin QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

Otyrys barysynda mınıstr sýmen jabdyqtaý men sý burý sektorynda pysyqtaýdy qajet etetin problemalardy atady.

«Birinshiden, bul - kommýnaldyq kásiporyndar teńgerimindegi sýmen jabdyqtaý men sý burý oqshaý júıeleriniń tıisinshe paıdalanylyp, kútip ustalmaýy. Atalǵan problema olardyń tez tozýyna alyp keledi. Qazirgi zamanǵy tájirıbe sýmen jabdyqtaý jáne sý burý sektoryna salynǵan ınvestıtsııalar halyqqa kórsetiletin qyzmetterdiń turaqtylyǵymen qamtamasyz etilýi tıis ekenin kórsetedi. Óz kezeginde, kórsetiletin qyzmetterdiń sapasyn arttyrý úshin tek sýmen jabdyqtaý men sý burý júıelerin rekonstrýktsııalaý nemese jańalaryn salý jetkiliksiz, olardyń tıisinshe paıdalanylýyn qamtamasyz etý qajet. Paıdalanýshy uıymdardyń uıymdastyrýshylyq, basqarýshylyq, tehnıkalyq jáne qarjylyq áleýetin de ulǵaıtý kerek», - dedi ol.

Onyń aıtýynsha, «Qazsýshar» respýblıkalyq memlekettik kásipornynyń bazasynda kent ishindegi jelilermen birge barlyq toptyq sý qubyrlaryn paıdalanatyn Biryńǵaı operatordyń jumys isteýi bul máseleni ońtaıly sheshýge múmkindik bermek. Ol úshin kommýnaldyq menshiktegi osy nysandardy kezeń-kezeńimen biryńǵaı operatorǵa berý qajet bolady.

«Birinshi kezeńde ákimdikter teńgeriminde turǵan 323 aýyldaǵy respýblıkalyq toptyq sý qubyryna jalǵasqan kent ishindegi jeliler beriledi. Ekinshi kezeńde 171 aýyldaǵy kent ishindegi jelilermen birge qalǵan 33 toptyq sý qubyry beriledi dep josparlanǵan. Bul bıýdjet qarajatyn tıimdi paıdalanýǵa, aýyldarda sýmen jabdyqtaý men sý burý boıynsha kórsetiletin qyzmetterdiń sapasyn jaqsartýǵa, sondaı-aq sýmen jabdyqtaý jáne sý burý sektoryn damytýǵa ınvestıtsııa tartýǵa múmkindik beredi. Munan basqa, qyzmetter sýdy toptyq sý qubyrlarynan sýbsıdııalanǵan tarıfpen satyp alyp, halyqqa ústeme qunmen satatyn deldaldardy boldyrmaı, sýmen jabdyqtaý kózinen bastap túpkilikti tutynýshyǵa deıin kórsetiledi», - dedi S.Omarov.

Mınıstr sýbsıdııalaý qaǵıdalaryna sáıkes túpkilikti tutynýshy úshin 1 tekshe metr aýyz sý quny sýdy esepke alý aspaptary bolsa, 30 teńgeden, olar bolmasa, 40 teńgeden aspaýy tıis ekenin basa aıtty.

«Sýmen jabdyqtaý men sý burýdyń oqshaý júıelerin paıdalanýdy jergilikti atqarýshy organdar men jeke uıymdardyń qaramaǵyna qaldyrǵan jón», - dedi ol.