Tursynbek Qabatov UBT-ǵa qatysty daý-damaı jóninde vıdeo jarııalady
Áleýmettik jelide UBT tapsyrý kezinde zań buzǵan 19 talapkerdiń arasynda shoýmen Tursynbek Qabatovtyń qyzy Ádemi Amanǵalı da bar degen aqparat taraǵan bolatyn.
Tanymal ártis Instagram paraqshasynda osy shýǵa baılanysty málimdeme jasady.
«Armysyzdar qurmetti Otandastar! Kesheli beri qyzý talqylanyp jatqan keleńsiz oqıǵanyń shyn mánisinde qalaı bolǵany týraly túsindire ketkendi jón sanadym. Ata-ana retinde bul oqıǵa bizge de óte aýyr tıip otyr. Qoldaý bildirip jatqan jandarǵa zor rahmet. Oqıǵa boıynsha aıtarym osy vıdeoda», - dep jazdy ol.
Vıdeodaǵy Tursynbek Qabatov pen ózin «Nurbek» dep tanystyrǵan jigittiń áńgimesinde áýel basta eki arada repetıtorlyq týraly kelisim bolǵany aıtylady. Sóz arasynda Tursynbek Qabatov óziniń UBT-daǵy quıtyrqy áreket týraly habarsyz bolǵany birneshe ret qaıtalap aıtqan.
«Kesheden beri ana ortalyqtaryńa bardym. Jeksenbi bolyp, joldaryń bolyp ketti desem bolady senderge. Keshe jaı ǵana keshirim surap, vıdeo jibere salypsyńdar, betin buldyratyp. Oǵan kim senedi», - degen shoýmen tutqanyń ar jaǵyndaǵy jigitten nege astyrtyn áreketke barǵanyn suraıdy.
«Nurbek, sen maǵan mynany túsindirshi. Bolatyn jaǵdaıdy nege sen nege maǵan aıtpaı, anasyna aıtpaı, ondaı tirlikke bardyń? Ekinshi qyz kim? Ony kim taýyp júr, sen be», - dep suraıdy.
Tutqanyń ar jaǵyndaǵy daýys UBT-ǵa ártistiń qyzyn ózi daıyndaǵandyqtan, joǵary ball alǵyzyp, «ata-anasyn tosynnan qýantqysy kelgenin» aıtqan.
Ári qaraı ekeýara áńgimeden Ádemi Tursynbekqyzy Amanǵalıdyń UBT kezindegi quıtyrqy «tásil» týraly testileýge kirer kezde ǵana bilgeni týraly aıtylady. Sondaı-aq, Tursynbek Qabatov qyzyna o basta UBT-dan joǵary ball jınaý týraly talap qoımaǵanyn, shetelde oqytýdy josparlaǵanyn aıtady.
«Bireýdiń aýzynan jyryp, bireýdiń grantyn tartyp bereıin degen nıetim joq», - deıdi ol sóz arasynda.
Sóz sońynda Tursynbek Qabatov endigi máseleni quzyrly organdar sheshetinin, tek túsinbeýshilik saldarynan eldiń aldynda abyroısyz atqa qalǵanyn aıtyp qynjylady.
«Qatelespeıtin adam joq. Maǵan eskertip, aqyldasýyń kerek edi. Qyzym ákesiniń kózine qarap sóılemeıtin qyz. UBT-da zańsyz áreketke barmaq túgil, qalany durys bilmeıdi. Mektep pen úıdiń arasyna máshınemen aparyp, ákelip júrgen bala. Tergeý júrip jatsa, zań bar. Keshirmeıdi emes, keshirem ǵoı. Eldiń aldynda abyroıyma nuqsan keldi», - degen shoýmen istiń baıybyna barmaı, Ádemi Amanǵalıdyń derbes derekteri men sýretin jelige salǵan ınternet qoldanýshylarǵa renishin bildiredi.