Týroperatorlar arab týrısterin Qazaqstanǵa shaqyrdy

NUR-SULTAN. QazAqparat - 9-12 mamyrynda Dýbaı qalasynda (Birikken Arab Ámirlikteri) «ATM 2022» (Arabian Travel Market) 28-shi Halyqaralyq týrıstik kórmesi ótip jatyr, dep habarlaıdy QazAqparat.

Atalǵan kórmege týrızm baǵyty boıynsha 12 qazaqstandyq týroperator qatysýda.

Bıylǵy jyly resmı derekter boıynsha ATM kórmesine 112 eldiń ókilderi qatysyp, 1500 eksponenttiń stendteri qoıyldy. Kórmege barlyǵy 20 myńnan astam adam keledi dep kútilýde.

Qazaqstan delegatsııasy arab naryǵyna Almaty men Nur-Sultan qalalaryna baryp, olardyń mańaıynda ornalasqan ulttyq parkterge saıahattaýdy, sondaı-aq Mańǵystaý, Túrkistan jáne basqa da óńirlerge saparlardy usynady.

Qazaqstandyq stendtiń ashylýyna QR-nyń BAÁ-degi Tótenshe jáne Ókiletti Elshisi Madııar Meńilbekov, sondaı-aq birqatar sheteldik kompanııalardyń ókilderi qatysty.

Qazaqstan stendiniń uıymdastyrýshylary men otandyq týrbıznes ókilderiniń aıtýynsha, Taıaý Shyǵys elderiniń shyǵý týrızmi eń jyldam damyp kele jatqan naryq bolyp tabylady.

«Bul pandemııa kezindegi eki jyldyq úzilisten keıin Qazaqstannyń ulttyq stendimen qatysyp otyrǵan alǵashqy halyqaralyq týrıstik kórmemiz. Onyń BAÁ-de ótýi kezdeısoq emes, sebebi ol elimiz úshin Taıaý Shyǵystyń basqa elderimen birge TMD naryǵynan keıingi mańyzdy maqsatty naryqtardyń biri bolyp tabylady» , - dep atap ótti Kazakh Tourism ulttyq kompanııasynyń Basqarýshy dırektory Danıel Serjanuly.

Osyǵan baılanysty Qazaqstannyń týrıstik áleýetin osy baǵytta ilgeriletý kúsheıtilýde. Mysaly, osydan buryn Kazakh Tourism Qazaqstan elshiligimen birlesip Saýd Arabııasynyń Djıdda, Rııad jáne Dammam qalalarynda roýd-shoý serııasyn uıymdastyrdy.

Aǵymdaǵy jyldyń 1 qazanynda QR men BAÁ arasynda dıplomatııalyq qatynastardyń ornaǵanyna 30 jyl tolatynyn atap ótken jón. Osyǵan baılanysty, kúzde Ámirlikterde kezekti roýd-shoý serııasyn uıymdastyrý josparlanýda, onda qazaqstandyq týrkompanııalar qysqy demalys boıynsha óz usynystaryn usynady.