Turmysymyzdy jaqsartýǵa memleket ǵana emes, ózimiz de múddeli bolýymyz kerek- Roman Chep
«Memleket basshysy retinde Qasym-Jomart Toqaevtyń bankten nesıe alyp, qaryzǵa batqan azamattarymyzdyń jaǵdaıyna beı-jaı qaraı almaıtynyna kóz jetkizdik. Prezıdenttiń Jarlyqqa qol qoıýynyń maqsaty- qıyn jaǵdaıǵa tap bolǵan azamattarǵa kómektesý, olarǵa ózderiniń otbasylarynyń qarjylyq ahýalyn aıtarlyqtaı jaqsartýǵa múmkindik berý. Rasynda da, búgingi kúni kóp adamdardyń basynda bir emes, birneshe nesıeden bar. Árıne, adamdar erikkennen nesıe almaıdy, barlyǵy kúnkóristiń qamy. Kúnkóris. kúnkóris dep júrgende qalaı qaryzǵa batqanyn bilmeı qalady. Sodan otbasynyń berekesi ketip, tipti keıbiriniń shańyraqtary ortasyna túsip jatqany jasyryn emes. Óz basym talaı adamnyń bankke nesıe tóleı almaı bankten bas saýǵalap júrgenin kórgenmin. Tipti, keıbirine osyndaı problemadan keıin bankter ekinshi ret esiginen de syǵalatpaıdy. Bul ásirese, áleýmettik jaǵynan az qamtylǵan, turmysy tómen jáne kópbalaly otbasylarda jıi kezdesetin jaǵdaı. Sony túsingen Qasym-Jomart Toqaev áleýmettik kómek kórsetý týraly óte durys sheshim qabyldap otyr. Bul bizderdi erekshe qýantyp otyr», - deıdi jas otaǵasy.
Roman Chep 2013 jyly balalar úıinen úlken ómirge joldama alǵan eken. Búginde ózi eki balanyń ákesi. Osyǵan deıin onyń da basynda birneshe nesıe bolypty. Jaqynda memlekettik baǵdarlamanyń kómegi arqasynda jańa páterge qol jetkizgen. Onyń áleýmettik kómek turǵysyndaǵy memleket saıasatyna degen rızashylyǵyn mol.
«Osyǵan deıin baspana jaldap júrgen kezimde meniń de basymda birneshe nesıe boldy. Azǵana aılyǵyń páter jaldaýǵa ketse, ishetin tamaǵyń men kıimińdi nesıege alasyń. Odan basqa amal joq. Qazaqta ataly sóz bar ǵoı, «Úıi joqtyń kúı joq» degen. Búgingi kúni baspanasyz júrgen kez-kelgen otbasynyń jaǵdaıy osyndaı. Jaqynda memlekettik baǵdarlamanyń kómegimen Kókshetaý qalasynyń Saryarqa shaǵynaýdanynda jańadan salynǵan turǵyn úıden eki bólmeli páter aldym. Muny men memlekettiń qazaqstandyqtardy áleýmettik turǵyda qoldaý úshin jasap jatqan sharalardyń nátıjesi dep bilemin. Turmysymyz jaqsaryp, ál-aýqatymyzdyń artýyna memleket ǵana emes, ózimizde atsalsýymyz kerek», deıdi ol.
Eske sala keteıik, keshe QR Prezıdenti Qasym-Jomart Toqaev «Qazaqstan Respýblıkasy azamattarynyń qaryz júktemesin azaıtý týraly» Jarlyqqa qol qoıǵan bolatyn.