Turmysy tómen toptan shyqqan 50 myń balaǵa kolledjde oqý granty berildi

NUR-SULTAN. QazAqparat - Áleýmettik osal toptardan shyqqan 50 myńnan astam bala kolledjde oqý grantyn ıelendi, dep habarlaıdy QR BǴM baspasóz qyzmeti.

Ótken jylmen salystyrǵanda jeńildikter boıynsha oqýǵa túsken talapkerlerdiń sany 16 myńǵa artty. Bul kvota sanattarynyń tizimin keńeıtýdiń nátıjesinde múmkin bolyp otyr.

«Memleket basshysynyń tapsyrmasy boıynsha bıyl alǵash ret azamattardyń áleýmettik osal toptarynan shyqqan balalardyń kolledjderge túsýi úshin kvotalar engizildi. Bul jetim balalar, ata-anasynyń qamqorlyǵynsyz qalǵan balalar, kópbalaly jáne tolyq emes otbasylardan shyqqan balalar, múgedek balalar, múgedek balalardy tárbıelep otyrǵan otbasylardan shyqqan balalar, sondaı-aq UOS qatysýshylary men múgedekterine jeńildikter boıynsha teńestirilgen adamdar. Sondaı-aq kvota boıynsha memlekettik bilim granttaryn aýyl jastary da ıelendi», – dep atap ótti QR BǴM Tehnıkalyq jáne kásiptik bilim departamentiniń dırektory Nasymjan Ospanova.

Bıyl elimizdegi kolledjderge 9-11 synyptardyń 95 myńnan astam túlegi oqýǵa tústi. Ásirese, medıtsınalyq jáne shyǵarmashylyq mamandyqtar suranysqa ıe boldy.

Bıyl kolledjderge qabyldaý 25 maýsymda bastalyp, 31 tamyzǵa deıin jalǵasty.

Granttar «aqsha stýdentpen birge júredi» qaǵıdaty boıynsha bólindi, bul oryn alǵan jańashyldyqtardyń biri. ıAǵnı, eger buryn-sońdy memlekettik tapsyrys oryndaryn kolledjder boıynsha komıssııa bóletin bolsa, endi bul protsess barynsha ashyq bola tústi. Jańa erejege sáıkes, talapker qaı kolledjdi tańdasa, bıýdjet qarajaty da sol oqý ornyna baǵyttalady.

Sonymen qatar eger buryn talapkerler tek 1 mamandyq pen 1 kolledjdi ǵana tańdaı alsa, bıyl túlekterge 4 mamandyq pen 4 kolledjdi tańdaý múmkindigi berildi.

Granttardy bólý aqparattyq júıeler arqyly júzege asyryldy. Bul da ashyqtyqty qamtamasyz etýge baǵyttalǵan.