Turmysy tómen otbasy máselelerin únsiz qaldyrýǵa bolmaıdy – Lázzat Ramazanova

NUR-SULTAN. QazAqparat - Qazaqstannyń árbir aýdanynda qıyn ómirlik jaǵdaıǵa tap bolǵan jáne muqtaj adamdarǵa kómek kórsetetin otbasyn qoldaý ortalyqtary paıda bolady. Bul rette ákimdikter qazirdiń ózinde jumys istep turǵan úkimettik emes sektor iske asyryp jatqan áleýmettik jobalardy qoldaýdan bas tartpaýǵa tıis.

Bul týraly QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Lázzat Ramazanova Almaty oblysynyń jurtshylyǵymen kezdesýde málimdedi.

Іs-sharaǵa oblystyq jáne aýdandyq komıssııalardyń músheleri, quqyq qorǵaý organdarynyń, ákimdikterdiń ókilderi, bıznestegi áıelder, qoǵamdyq uıymdardyń ókilderi qatysty.

Kezdesýge Qazaqstandaǵy «BUU-Áıelder» bólimshesiniń basshysy Marııa Dotsenko qatysty.

Lázzat Ramazanova júrgizilip jatqan saıası reformalar aıasynda halyqtyń áleýmettik osal toptaryn qoldaý, sondaı-aq ómirlik qıyn jaǵdaıǵa tap bolǵan adamdarǵa júıeli kómek kórsetý máseleleri erekshe mańyzǵa ıe bolyp otyrǵanyn atap ótti. Osy máselelerdi sheshý úshin elimizdiń ár aýdanynda Otbasyn qoldaý ortalyǵy qurylady. Olardyń jumysy qazir Qazaqstannyń barlyq aımaqtarynda ashylyp jatqan Áıelder kásipkerligin qoldaý ortalyqtarymen úılestiriletin bolady. Osylaısha, áıelder tek qajetti qoldaýdy ǵana emes, budan ári óz isin bastaý úshin tájirıbelik bilim de alatyn bolady.

Osy oraıda, Ulttyq komısııa tóraǵasy búgingi tańda problemalardy jaýyp qoımaı, aımaqtyq erekshelikterdi eskere otyryp, syndarly sheshimderdi usynýdyń mańyzy zor ekenin atap ótti.

«Turmysy tómen otbasy máselelerin únsiz qaldyrýǵa bolmaıdy. Qazir, olystan bastap aýdandyq deńgeıge deıingi barlyq memlekettik organdardyń, ÚEU – nyń, jurtshylyqtyń tartylýy, prıntsıpshildigi jáne kásibıligi asa qajet. Biz tek tyńdaıtyn ǵana emes, áreket etetin memleket bolýymyz qajet. Tek óńirlik bastamalar men suraýlar «dárejesi» ǵana Qazaqstannyń otbasylyq jáne genderlik saıasaty tujyrymdamasynda belgilengen reformalardy tıimdi iske asyrýǵa kómektesedi. Bizdiń maqsatymyz-myqty otbasylar, baqytty balalar men ata – analar», - dep atap ótti Lázzat Ramazanova.

Almaty qalasyna sapary barysynda Ulttyq komıssııa basshysy áleýmettik jobalardy iske asyratyn ÚEU ókilderimen – turmysy tómen jáne kóp balaly otbasylarǵa arnalǵan «Baqytty otbasy» ortalyǵy jáne «Zere» áleýmettik damý ortalyǵy ókilderimen kezdesti.

Ortalyq qyzmetkerleri muqtaj áıelderge júıeli kómek kórsetedi, túrli mamandyqtardyń qyr-syryn úıretedi, keıin Memlekettik baǵdarlamalar boıynsha granttar men nesıeler alýda súıemeldeıdi. Atqarylǵan jumystardyń arqasynda júzdegen áıel óziniń materıaldyq jáne turǵyn úı jaǵdaıyn jaqsartyp, tegin zań keńesterin aldy.

Lázzat Ramazanova mundaı ortalyqtar jergilikti atqarýshy organdar tarapynan turaqty qoldaýdy qajet etetinine nazar aýdardy.

«Memlekettik satyp alýǵa qatysýdyń qoldanystaǵy júıesi mundaı jobalardy qyzmetkerlerdiń jalaqysyn josparlaý, úı-jaılardy jalǵa alý úshin ýaqtyly esep aıyrysý múmkindiginen aıyrady. Qyzmetkerler muqtaj adamdarǵa kórsetetin úlken kómegimen qatar, únemi ómir súrý úshin kúresýge májbúr. Mundaı ÚEU jumysy máselelerinde ákimdikter tarapynan turaqty qoldaýdy qamtamasyz etý mańyzdy», - dep atap ótti Lázzat Ramazanova.

Sapar barysynda kezdesýge qatysýshylar Lázzat Ramazanovadan ataýly áleýmettik kómek berý, muqtaj jáne jas otbasylardy turǵyn úımen qamtamasyz etý máselelerin zańnamalyq túrde qaıta qaraýdy, Qazaqstandaǵy kóp balaly otbasylardyń mártebesin qaıta qaraýdy surady. Іskerlik qoǵamdastyq ókilderi shaǵyn óndirister úshin kadrlar daıarlaý, memlekettik satyp alýǵa qatysý úshin taýarlardyń qazaqstandyq shyǵý tegi týraly sertıfıkattar alý jáne basqa da problemalar týraly aıtty. Ulttyq komıssııa barlyq aıtylǵan máseleler men problemalardy jumys barysynda nazarǵa alady.