Turmystyq zorlyq-zombylyq jasaǵandar 30 kún boıy jábirlenýshimen kezdespeıdi

NUR-SULTAN. QazAqparat – Otbasylyq janjal shyǵaratyndarǵa 30 kún boıy jábirlenýshimen kezdesý nemese baılanysqa shyǵýǵa tyıym salynýy múmkin. Bul týraly Májilistiń jalpy otyrysynda tıisti zań jobasyn talqylaý kezinde málim boldy, dep habarlaıdy QazAqparat tilshisi.

Depýtat Irına Ýnjakovanyń sózine qaraǵanda, zań jobasyna sáıkes, turmystyq zorlyq-zombylyq qateri týraly habarlamanyń ózi, onyń ishinde áleýmettik jelide ornalasqan málimet te polıtseılerdiń áreket etýine negiz bolady.

Sonymen qatar, qorǵaý uıǵarymyn shyǵarýda polıtseılerdiń ókilettigin keńeıtý usynyldy.

Depýtattar otbasylyq-turmystyq zorlyq-zombylyq jaǵdaıynda aıypty adamdy baspanasynan shettetip, jábirlenýshimen jáne balalarymen 30 kún boıy kezdestirmeý shekteýin eskerýdi atap ótti.

Budan buryn habarlanǵandaı, Parlament Májilisiniń jalpy otyrysynda «Otbasylyq-turmystyq zorlyq-zombylyqqa qarsy is-qımyl týraly» zań jobasyn, sondaı-aq «Qazaqstan Respýblıkasynyń keıbir zańnamalyq aktilerine otbasylyq-turmystyq zorlyq-zombylyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.