Turmystyq kómirge saraptama jasaý Energetıka mınıstrliginiń quziretine kirmeıdi - komıtet basshysy

ASTANA. QazAqparat - QR Energetıka mınıstrligi Atom jáne energetıkalyq qadaǵalaý men baqylaý komıtetiniń tóraǵasy Suńǵat Esimhan kómir satý naryǵyndaǵy ahýalǵa baılanysty pikir bildirdi, dep habarlaıdy QazAqparat.

«Búginde kómir dalada jatqan joq. Ol sony satatyn sýbektilerdiń otyn qoımalarynda. Taǵy da aıtamyn, dál osy turmystyq kómirge saraptama jasaýmen aınalysý Energetıka mınıstrliginiń quziretine kirmeıdi. Degenmen, oryn alyp jatqan bul máselelerge baılanysty saraptama jasadyq. Kásiporyndary bar birneshe temir jol tuıyqtary bar. Máselen, Astanada Soltústikti energııalyq kómirmen jadbyqtaý dep atalatyn kásiporynnyń birneshe tuıyǵy bar. Qaraǵandyda Qazferıt, Qaztranskómir, Almatyda da birneshe jeke kásipkerlik bar. Olarǵa bizdiń qyzmetkerler baryp, kómirdiń bar ekenin aıtyp otyr. Kómirge qatysty barǵan kezde kómir bolmaı qalý degen problema joq», - dedi ol Ortalyq kommýnıkatsııalar qyzmetinde ótken brıfıngte BAQ ókilderiniń saýalyna jaýap bere kele.

Osy rette ol kezektiń kúrt artyp ketýine kómirge degen suranystyń kúrt kóbeıýimen baılanystyrdy.

«Eger shyndyǵyn aıtsaq, mundaı suranysqa baılanysty kezek barlyq jerde bar. Biz barlyq iri núktelerdi tekserdik. Buǵan qosa, arnaıy oryndarda da kómir satylyp jatyr. Tehnıkasy bar shaǵyn jáne orta bıznes kómirdi tıep alyp, arnaıy oryndarda satýda. Biz aralap shyǵyp, sýretke túsirdik, kómir tıelgen mashına kóp tur», - dedi Suńǵat Esimhanov.