Turmystyq zorlyq týraly zańnyń qabyldanýy qoǵamnyń kemeldengenin kórsetedi – Azıza Shójeeva

<p>ASTANA. KAZINFORM &ndash; QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Azıza Shójeeva &laquo;Áıelder isteri jáne otbasylyq-demografııalyq saıasat týraly&raquo; Zańynyń qabyldanýyna qatysty pikirin aıtty. Onyń oıynsha, áıelderdiń quqyqtaryn qorǵaý jáne balalardyń qaýipsizdigin qamtamasyz etý búkil Qazaqstan qoǵamynyń damýy úshin óte mańyzdy.</p>

Azıza Shójeeva 2017 jyly elimizde turmystyq zorlyq-zombylyq úshin jaýapkershilik álsiz bolǵanyn, 2019 jyldan bastap osy ýaqytqa deıin qoǵamda turmystyq zorlyq-zombylyqpen kúresý, oǵan qarsy turý týrasynda pikirtalastar júrip jatqanyn aıtty. Onyń pikirinshe, turmystyq zorlyq-zombylyq – qoǵamymyzdyń áleýmettik-ekonomıkalyq jáne áleýmettik-mádenı problemasy. Zańnyń qabyldanýy qoǵamdy eleń etkizip, zorlyq-zombylyqqa tózbeýshilikti yntalandyrýǵa tıis. Bul zańnyń qabyldanýy tek jazalaý ǵana emes, aqparattyq-aǵartýshylyq fýnktsııalardy da atqarady.

«Qabyldanǵan zańnyń jazalaý fýnktsııasyna qatysty aıta keteıin, kámeletke tolmaǵandarǵa qarsy qylmystar úshin jaza qatańdatylǵan. Adam óltirý, zorlaý, jynystyq sıpattaǵy zorlyq-zombylyq, kámeletke tolmaǵandarǵa qatysty jynystyq qolsuǵýshylyq, jeke adamǵa qarsy aýyr qylmystar úshin ómir boıy bas bostandyǵynan aıyrý jazasy engizilgen. Qabyldanǵan zańda densaýlyqqa qasaqana jeńil zııan keltirý, dene jaraqatyn salý, ózin-ózi óltirýge ıtermeleý jáne oǵan yqpal etý áreketteri qylmystyq jaýapkershilik júkteıtinin kórip otyrmyz. Kámeletke tolmaǵandarǵa qatysty jasalǵan bul áreketter úshin uzaq merzimge bas bostandyǵynan aıyrý jazasy qarastyrylǵan», - dep atap ótti Azıza Shójeeva «QazAqparat» agenttigi tilshisine bergen jaýabynda.

Ol qasaqana jasalǵan densaýlyqqa zııany ortasha áreketter úshin bas bostandyǵynan aıyrý merzimi ulǵaıtylǵanyn aıtty. Azaptaý isi boıynsha 7 jylǵa deıin bas bostandyǵynan aıyrý túrindegi eń joǵary jaza qarastyrylǵan. Sondaı-aq zańda ata-analardyń balalardyń qaýipsizdigin qamtamasyz etý jaýapkershiligin kúsheıtýge de basa mán berilgen.

Alǵash ret zańnamalyq deńgeıde áıelder men balalardyń quqyqtaryn qorǵaý, sondaı-aq otbasyn qoldaý ortalyqtaryn qurý úshin otbasy máseleleri boıynsha 111 baılanys ortalyǵynyń jumys isteýine quqyqtyq negiz jasalǵanyn atap ótken jón.

«Biz osy zańnyń oryndalýyn keńinen talqylaýǵa bastamashylyq etýimiz kerek. Árbir qazaqstandyq memleket otbasy músheleri arasyndaǵy turmystyq zorlyq-zombylyqty qoldamaıtynyn túsindirý mańyzdy. Biz zorlyq-zombylyqtyń barlyq túrine «joq» dep aıtýymyz kerek. Bul máseleni nazardan tys qaldyrmaýymyz qajet. Zańnyń qabyldanýy qazirgi qoǵamnyń qanshalyqty kemeldengenin, zorlyq-zombylyqty qabyldamaıtynyn kórsetedi», - dep túıindedi Azıza Shójeeva.