Túrmeler sanyn qysqartýdyń paıdasy qandaı
«2012 jyldan beri biz 8 kolonııany qysqarttyq. Sonda bir jyldyń ishinde 12 mıllıard teńge únemdelip otyr. Al ol aqshany probatsııaǵa, qylmystyń aldyn alý sharalaryna jumsaýǵa múmkindik bar. Sosyn qoǵam úshin adamnyń jumys istegeni tıimdi ǵoı. Áıtpese, ony túrmede ustaý úshin qyrýar aqsha jumsalady. Ol jerdegi dástúrli emes dinı aǵymdar da bolady. Soǵan qosylyp, túrme mádenıetin nasıxattaǵansha qoǵamnyń belsindi ókili bolyp, elge eńbek sińirgen jaqsy emes pe? Mine, túrmelerdi qysqartýdyń tıimdi tusy osy», - dedi M.Axmetjanov Astanada ótken baspasóz máslıxatynda.
Onyń aıtýynsha, qazirgi kezde Astanadaǵy qatań rejımdegi túrme jabylyp jatyr. Onyń ornyna jeńil tártiptegi kolonııa ashylady.
«Buryn qatań, orta jáne jeńil rejımdi túrmeler bolsa, qazir aralastyryp salyp jatyrmyz. Mysaly, Qyzylorda jaqta sondaı túrme ashylyp otyr. Buryn Qyzylorda mańaıynda tek qatań rejımdi mekemeler ǵana boldy. Al jeńil jazamen sottalǵan jergilikti azamattardy basqa aımaqtarǵa jiberýge týra keldi. Sol sebepti aralas mekemelerdi salý týraly sheshim qabyldandy. Sonda azamattar óz jerinde, týǵan-týystardyń qasynda jazasyn óteıdi. Atalǵan sharalar áli de jalǵasady», - dep atap kórsetti M.Axmetjanov.
Aıta keteıik, búgingi baspasóz máslıxatynda M.Axmetjanov 5 myń adamdy túrmeden bosatýǵa qatysty túsinik berdi.
«Búginde áleýmettik jelilerde shyndyqqa janaspaıtyn aqparattar taralýda. Aýyr qylmys jasaǵan 5 myń adam shyǵady deıdi. Olar zorlyq jasaǵan, adam óltirgen, qaraqshylyq jasaǵan deıdi. Buqaralyq aqparat quraldaryna da jańalyqtar shyqty. Bunyń barlyǵy shyndyqqa janaspaıdy. Bireýler máseleniń anyq-qanyǵyna mán bermedi, endi bireýler sensatsııa jasaımyz dep, solaı berdi. Sonyń saldarynan qoǵam ol jańalyqty durys túsinbeı qaldy», - dep atap kórsetti M.Axmetjanov. Onyń aıtýynsha, 5 myń adamnyń ishinde qaraqshylar, pedofılder, zorlyq jasaǵandar, adam óltirgen basbuzarlar joq.