Túrmege jasyryn kamerasy bar kózildirik kirgizilmek bolǵan

NUR-SULTAN. QazAqparat – Shymkent qalasy jáne Túrkistan oblysy boıynsha QAJ departamenti jedel bóliminiń qyzmetkerleri portatıvti kamerasy bar erekshe sálemdemeniń kolonııa aýmaǵyna kirýiniń aldyn aldy, dep habarlaıdy QazAqparat QR ІІM Qylmystyq-atqarý júıesi komıtetiniń telegram kanalyna silteme jasap.

Sottalǵandardyń biriniń atyna poshtamen kelgen banderoldi tekserý barysynda jasyryn mıkro-beınebaqylaý kamerasy ornatylǵan kózildirik tárkilendi. Oqıǵa ornyna jedel-tergeý toby jetip, materıaldar protsessýaldyq sheshim qabyldaýǵa joldandy.

«Jyl basynan beri Shymkent qalasy men Túrkistan oblysy boıynsha qylmystyq-atqarý júıesiniń qyzmetkerleri sálemdemeler men banderolder arqyly keletin tyıym salynǵan zattardy berýdiń 20-dan astam áreketiniń jolyn kesti. Kóbinese olar - esirtki zattary men uıaly telefondar. Alaıda, biz úshin mundaı erekshe qurylǵynyń tárkilenýi alǵash ret bolyp otyr. Buǵan deıin óńirde osyǵan uqsas faktiler tirkelmegen», - deıdi óńirlik QAJ departamenti.

«Tosyn syıy» bar sálemdeme aýyr jáne asa aýyr qylmystar (adam urlaý, bopsalaý, terrorızm) úshin 14 jylǵa sottalǵan jazasyn óteýshiniń atyna kelgen.

Departamenttiń málimdeýinshe, eskertýler men zańsyz is-áreketterge qarsy júrgiziletin sharalarǵa qaramastan, penıtentsıarlyq mekemeniń aýmaǵynda paıdalanýǵa tyıym salynǵan zattardyń túsýi toqtamaı tur.

Buǵan deıin Qyzylordada túrmege palaý arasyna 3 telefon jasyryp ótkizbek bolǵan adam ustalǵan edi.