Túrmedegi sottalǵandar Alǵys aıtý hatyn jazdy

ASTANA. QazAqparat - Búgin elimizde barsha jurtshylyq Alǵys aıtý kúnin atap ótýde. Jazasyn ótep jatqan sottalǵandar da nazardan tys qalǵan joq, dep habarlaıdy ІІM Qylmystyq-atqarý júıesi komıtetiniń baspasóz qyzmeti.

Astana qalasy boıynsha Qylmystyq-atqarý júıesi departamentine qarasty ETs-166/5 mekemesi (qaýipsizdigi barynsha joǵary mekeme) ákimshiliginiń bastamasymen sottalǵan azamattar týystary men jaqyndaryna arnap alǵys hatyn jazdy.

Temir tordyń arǵy jaǵynda otyrǵan adamdardyń hatyn oqyp otyryp, qanshalyqty aýyr qylmys jasasa da, olardyń júregindegi meıirim men bolashaqqa degen úmit sáýlesiniń sónbegendigi baıqalady.

«..Búgin alǵys bildirýge múmkindik bergenderdiń bárine, qıyn sátterde janymda bolyp, menen bas tartpaǵany úshin jaqyndarym men týǵandaryma alǵys aıtamyn», - dep jazady sottalǵan A.Fılatov.

Kelesi bir hatta sottalǵan A. Orazqulov,týǵan-týystaryna jazǵan hatynda: «Ata-anańdaı baǵyp-qaǵyp, búkil jaǵdaıyńdy jasap otyrǵan mekeme jumyskerlerine shyn kóńilimmen rızashylyǵymdy bildirip, barlyǵyna shyn júrekten alǵysymdy aıtqym keledi», - dep aıaqtaıdy.

Árbir hatta qıyn kezeńde qoldaý kórsetkeni úshin ata-anasyna, jaqyndaryna jáne Elbasyna beıbit ómir úshin alǵys aıtylǵan.

Óz kezeginde, sottalǵan azamattar úshin jaqyndarynyń qoldaýy, kolonııa ishinde uıymdastyrylatyn tárbıelik is-sharalar olardyń túzý jolǵa túsip, bostandyqqa shyqqannan keıingi ómirinde qoǵamǵa ońaı sińisip ketýine yqpal etedi.