Túrmede jazasyn ótep júrip jumys isteıtinder qansha jalaqy alady

ASTANA. QazAqparat – Qazaqstanda sottalýshynyń jazasyn ótep júrip jumys isteýine múmkindik bar. Aılyq kólemi 25-80 myń teńge aralyǵynda, dep habarlaıdy QazAqparat QR ІІM Qylmystyq atqarý júıesi komıtetine silteme jasap.

«Qylmystyq-atqarý júıesi mekemeleri aýmaǵynda 241 shaǵyn jáne orta bıznes sýbektisi jumys isteıdi. Onda 3 myńnan astam sottalǵan jumysqa ornalasqan. «Eńbek», «Eńbek-Óskemen» RMK-da jáne shaǵyn, orta bıznes sýbektilerinde jumysqa ornalasqan jazasyn óteýshilerge kelisimdi eńbekaqy tólenedi. Jalaqy mólsheri oryndalǵan jumys kólemine baılanysty. Máselen, sottalyp jumys istep jatqandar 25 myńnan 80 myń teńgege deıin aılyq alady. Al sharýashylyq qyzmette eńbek etip jatqan azamattarǵa 30 myńnan 75 myń teńgege deıin jalaqy belgilengen», - delingen komıtet habarlamasynda.

Qoldanystaǵy zańnamaǵa sáıkes, sottalǵan adamnyń mindetti qaryzyn óteý somasy tabysynyń 50%-nan aspaýy tıis.

«Eger jalaqy 25 myń teńge bolsa, onyń 12,5 myń teńgesi talapty óteýge ketedi. Osylaısha jylyna bul soma 150 myń teńgeni quraıdy. Árıne, jazasyn óteýshiniń qaryzy iri kólemde bolsa, ony túrmedegi jumyspen óteı almaıdy. Jalpy sottalýshylardyń deni jazasyn óteý kezinde jábirlenýshi jáne memleket aldyndaǵy qaryzyn ótep úlgeredi. Qaryzdy tez jabýǵa sottalýshylardyń ózderi de múddeli. Sebebi qaryzy joq bolsa, merziminen buryn bostandyqqa shyǵý múmkindigi bar», - deıdi vedomstvodan.

Foto: radiovan.fm