Túrmede qamaýda otyrǵandardyń jumyspen qamtylýy artty

ASTANA. QazAqparat - Bir jylda qamaýda otyrǵandardyń jumyspen qamtylýy artty. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Bas prokýratýrasy departamentiniń basshysy Serikbaı Erimbetov málim etti.

«Sottaǵan adamdy qoǵamǵa tolyqqandy múshe retinde qaıtarý jaqsy damyǵan, resotsıalızatsııa jumys istegen jaǵdaıda ǵana júzege asyrylady. Sol sebepti 5 ınstıtýtsıonaldy reformany júzege asyrýdyń «100 naqty qadam» Ult josparynyń 33 qadamy sottalǵan adamdardy áleýmettik ońaltýdyń tıimdi júıesin qurastyrýdy kózdep otyr. Erteń ótkiziletin forým sottalǵandardy resotsıalızatsııalaýdyń búgingi jaǵdaıyna taldaý jasap, túıtkildigi bar máselelerdiń barlyǵyn ashyp beredi degen oıdamyz», - dedi S.Erimbetov. Onyń sózine qaraǵanda, bul baǵyttaǵy máseleler kóp, sondyqtan forýmǵa Parlament depýtattary, halyqaralyq jáne otandyq sarapshylar, memlekettik organdardyń jáne úkimettik emes uıymdardyń ókilderi qatysady. Osyǵan deıin Bas prokýratýranyń bastamasymen «túrme reformalary» máseleleri boıynsha eki forým ótkizilgen bolatyn. Onda kóterilgen jobalardyń iske asýy sońǵy úsh jyldyń ishinde elimizdiń «túrmedegi adamdar sany» boıynsha halyqaralyq reıtıngide eleýli túrde joǵarylaýyna múmkindik berdi. «2013 jyldyń sońyna qaraı biz halyqaralyq túrme reıtınginde 35-shi orynda bolǵan edik. Sol kezde túzetý mekemelerinde 49 myńnan astam sottalýshy bolǵan. Búginde forým josparyn júzege asyrý baǵytynda oń nátıjeler bar ekenin aıtýǵa bolady. Eń bastysy, halyqaralyq túrme reıtınginde elimiz 35-shi orynnan 55-shi orynǵa kóterildi», - dedi ol. Departament basshysynyń aıtýynsha, ótken jyldyń jeltoqsanynda ótken ekinshi forým kolonııalardaǵy jumyspen qamtý máselesine arnaldy. Forýmda qabyldanǵan sharalar 2018 jylǵa qaraı qamaýda otyrǵan eńbekke qabilettilerdiń 75 paıyzyn jumyspen qamtamasyz etýi tıis. «Bul baǵytta sharalalar aıasynda tek bir jyl ǵana ýaqyt ótti jáne osy oraıda biz oń úrdisterdi baıqap otyrmyz. Kolonııalarda 133 jeke bıznes sýbektisi kásibin bastady, bul kórsetkish buǵan deıingi kórsetkishten 8 ese artyq. Qamaýdaǵylardyń jumyspen qamtylýy 50-den 54 paıyzǵa deıin artty», - dedi ol. Aıta keteıik, erteń elordada «Túrme reformasyna» arnalǵan ІIІ forým ótedi. Bul shara «Resotsıalızatsııa: Sen qoǵamǵa kereksiń! Ty nýjen obşestvý! Sosiety needs you!» jobasyn júzege asyrýǵa arnalady, buryn sottalǵandardy zańǵa baǵynýshy azamattar retinde qoǵamǵa reıntegratsııa jasaýǵa baǵyttalǵan.