Túrmede áıelder sany artyp barady - BUU

NUR-SULTAN. QazAqparat – Álemde túrmede jatqandardyń 7 paıyzyn áıelder quraıdy. Biraq olardyń sany tez ósýde, qamaýdaǵy er adamdar sanynyń ósýimen salystyrǵanda áldeqaıda jyldam artýda. Bul týraly BUU Adam quqyqtary jónindegi Joǵarǵy komıssary basqarmasynyń Dalalyq operatsııalar jáne tehnıkalyq yntymaqtastyq bóliminiń dırektory Jorjet Ganon málimdedi, dep habarlaıdy QazAqparat BUU jańalyqtaryna silteme jasap.

Onyń aıtýynsha, túrmedegi áıelder sanynyń kóbeıýi kóbinese qylmystyń jalpy ósýimen emes, «jekelegen elder bıliginiń qate saıası sheshimderimen» baılanysty.

Taǵy bir mańyzdy másele – túrmelerde adam sanynyń tolyp ketýi. Kem degende 114 elde ondaǵy adamdardyń sany syıymdylyqtyń resmı kórsetkishterinen asyp túsedi, al osy elderdiń 92-sinde túrmelerdiń tolýy 100-den 200 paıyzǵa deıingi kórsetkishti quraıdy.

714 000-ǵa jýyq áıelder men qyzdar temir torǵa qamalǵan. 2000 jyldan bastap túrmedegi áıelder men qyzdar sany 53 paıyzǵa, al erler sany 20 paıyzǵa kóbeıgen.

Koronavırýs pandemııasy túrmelerdegi jaǵdaıdy adam sanynyń tolyp ketý máselelerin ýshyqtyrdy. Vırýs juqtyrǵan qamaýdaǵylar sanynyń shekten tys kóbeıýi jazalaýdyń balama túrlerin qoldaný qajettiligin týdyrdy. Osyǵan baılanysty kóptegen memleket shartty túrde qamaýǵa alý jáne úı qamaǵyna alý tájirıbesin belsendi túrde qoldana bastady.