Túrme aýlasyna telefon men esirtki laqtyrmaq bolǵan turǵyn ustaldy
Shymkent qalasy jáne Túrkistan oblysy boıynsha qylmystyq atqarý júıesi departamentine qarasty №53 mekemesine telefon men esirtki ótkizbekshi bolǵan er adam ustaldy. Moped minip kelgen onyń ústindegi kıiminde «dostavşık» degen jazý bolǵan. Kúdikti qolyndaǵy sary tústi sómkesinen polıetılen paketti alyp, mekemeniń ishki aýmaǵyna laqtyrýǵa árekettengen. Degenmen kúzet qyzmeti ony qolǵa túsirdi.
Tekserý barysynda kúdiktiden 2 dana sensorly uıaly telefon, 2 dana sım karta jáne 2 dana qýattaǵysh tabyldy. Al ekinshi oramada spetsıfıkalyq ıisi bar, keptirilgen jasyl tústi shóp tárizdes zat bolǵan. Sondaı-aq, jeke basyna tintý-tekserý jumystaryn júrgizý barysynda qaltasynan paketke salynǵan aq, qara tústi belgisiz zattar jáne bir dana sirińke qorabyna jasyrylǵan spetsıfıkalyq ıisi bar, keptirilgen jasyl shóp tárizdes zat tárkilendi.
«Qazaqstan Respýblıkasynyń QK-niń 297-babynyń 1-bóligimen qylmystyq is qozǵaldy. Sot saraptamasynyń qorytyndysymen shalbarynyń qaltasynan tárkilengen polıetılen pakettegi aq, qara tústi belgisiz zattar «mefedron» sıntetıkalyq esirtki zaty, al sirińke qorabyna jasyrylǵan spetsıfıkalyq ıisi bar, keptirilgen jasyl shóp tártizdes zattyń «marıhýana» ekeni belgili boldy» - delingen Shymkent qalasy jáne Túrkistan oblysy boıynsha QAJ departamentiniń baspasóz qyzmeti taratqan aqparatta.