Túrme hám úlde men búlde: Qamalǵan juldyzdar qansha qarajattan qaǵyldy

<p>ASTANA. KAZINFORM — Óner juldyzdarynyń ár kúni tabys ákeletin toı-domalaq, kontsert, jarnamalyq túsirilimge toly ekeni belgili. Bul rette qamaýǵa alynǵan óner ıeleri temir tordyń ar jaǵynda jatqanda qansha qarajattan qaǵyldy eken?</p>

Árıne, óner juldyzdarynyń barlyǵy derlik tabysyn aıtýǵy qulyqty emes. Ony qoıshy, qarapaıym turǵyndardyń ózi «júrip-turýyma jetedi» dep aılyǵyn jasyryp júredi emes pe?

Ánshiler temir torǵa 15 kún bylaı tursyn, bes kúnge de toǵytylsa da qaltasyna salmaq salar degen oımen óner juldyzdarynyń kómekshilerine, prodıýserlerine habarlastyq. Barlyǵy «ondaı aqparat bere almaımyz» dep at-tonyn ala qashty.

Elimizge tanymal prodıýser Altynbek Rahmetov bolsa bul jaıynda óz oıyn aıtyp berdi.

«Qamaýǵa alynǵan ánshiler mol tabystan qaǵylady deı almaspyn. Tursynbek qamaýdan shyǵa sala úlken kontsert berdi. Zal lyq toly. Qamaýǵa alynǵanynyń ózin ázilge aınaldyryp, odan saıyn kórermenniń ystyq yqylasyna bólenip jatyr. Qaırat Nurtas pen Ábdiǵappar Álqoja da qamaýdan shyǵa salyp kontsert bersinshi, zalda ıne shanshar oryn bolmaıtynyna senimdimin. Usaq jaǵymsyz áreket jasady eken dep halyq jek kórip ketpeıdi», — deıdi prodıýser. 

Qurylysta jumys isteıtin qarapaıym sylaqshynyń ózi on kún jumysqa shyqpasa qaltasyna salmaq salatyny túsinikti.

Altynbek Rahmetovtiń aıtýynsha, Qaırat Nurtas 19 shilde kúni Aqsý qalasynyń jáne Metallýrgter kúnine arnalǵan kontsertte óner kórsetýi kerek-tin.

«Kontsert uıymdastyrýshysy bolǵandyqtan Qaırat bul is-sharada shamamen 5 mln teńge qarajattan qaǵylǵanyn aıta alamyn. Al, basqa kontsertterin bilmedim. Jalpy, keıbir ánshi aptasyna bir ret toıyna shyǵady, endi biri qatarynan ár qaladaǵy merekelik is-sharalarǵa shapqylap ketetini belgili», — deıdi Altynbek Rahmetov.

Ánshiler ár qadamyn áleýmettik jelilerdegi paraqshasyna jarııalaıtyny belgili.

Bul rette gonararyn bilseńiz shamalap bolsyn aptasyna qansha tabys tapqanyn boljaýǵa bolar.

Toı uıymdastyrýshylarynyń aıtýynsha, Qaırat Nurtas búginde kem degende 2,5 mıllıon teńgege toıǵa shyǵady. Al Tursynbek Qabatovty toıyńyzǵa asaba retinde jaldasańyz 10-15 myń dollar qarajatyńyz daıyn bolsyn.

Ábdijappar Álqoja buǵan deıingi bergen suhbattarynyń birinde gonarar somasyn aıtýdan bas tartqan edi.

«Bireýlerge meniń gonorarym sómkesinen alyp „má“ deı salatyn aqsha. Al bireýlerge bir jyl boıy aınalyp tabatyn aqshasy. Gonarar mólsherin aıtpaımyn. Sebebi, gonorarymdy aıtatyn bolsam, halyqtyń arasynda bireýdiń jaǵdaıy jetedi, bireýdiki jetpeıdi. Gonorarymdy aıtsam, jaǵdaıy jetpeıtin kisiler, „oı, mynaý sumdyq eken ǵoı“ dep aıtýy múmkin. Al jaǵdaıǵa qarap aıtsam, jaǵdaıy myqty kisiler „mynanyń baǵasy osyndaı-aq pa?“ deıdi. Sondyqtan da aıtpaı-aq qoıaıyn», — degen edi Ábdijappar.

Esterińizge salsaq, buǵan deıin ushaqta janjal shyǵarǵan qazaqstandyq ánshi Qaırat Nurtastyń — 15, taǵy bir oryndaýshy Ábdijappar Álqoja tártip saqshysynyń zańdy talaptaryna baǵynbaǵany úshin 10 táýlikke qamalǵanyn jazǵan edik. 

Onyń aldynda Tursynbek Qabatov ta ushaqtaǵy qylyǵy úshin 5 táýlik otyryp shyqty. 

Qamaýǵa alynǵan úsh óner juldyzy týraly tanymal azamattar pikir bildirdi.

Óner juldyzdarynyń ushaqta tártip buzýyna baılanysty áýejaıdaǵy erejelerdi eske túsirdik.