Túrli baǵdarlamalar aıasynda qurylatyn jumystyń kóbisi ýaqytsha ekeni anyqtaldy - Májilis
«Memleket basshysy Qasym-Jomart Toqaev bıylǵy Joldaýynda kadrlyq áleýetti arttyrý máselelerinde birqatar basym baǵytty belgilep, Úkimetke naqty tapsyrmalar berdi. Aıtalyq, 2025 jyl «Jumysshy mamandyqtar jyly» bolyp jarııalandy. Sarapshylardyń oıynsha, qazirgi kezde kásiptik-tehnıkalyq bilimi bar mamandyqtarǵa degen suranys joǵary bilimdi túlekterge degen qajettilikten 70 paıyzǵa artyq. Osyǵan baılanysty tehnıkalyq jáne kásiptik bilim berýdi reformalaý arqyly jumysshy kásipterdiń bedelin arttyrý qajet», - dedi D. Espaeva Májiliste kadrlyq áleýetti nyǵaıtý taqyrybynda ótip jatqan Úkimet saǵatynda.
Onyń paıymynsha, eńbek adamynyń mártebesin arttyrý úshin yntalandyrý sharalary kerek. Sondaı-aq ekonomıkamyzdy bilikti kadrlarmen qamtamasyz etý maqsatynda qazirgi zamanǵy eńbek naryǵynyń suranysyn eskere otyryp, joǵary oqý oryndarynyń bilim berý baǵdarlamalaryn qaıta qarastyryp, ekonomıkanyń naqty sektorlarymen baılanysyn kúsheıtý qajet.
«Eńbek naryǵyn damytýdyń 2029 jylǵa deıingi tujyrymdamasynda ony damytýdyń negizgi tásilderi belgilengen. Atap aıtqanda, jańa sapaly jumys oryndaryn qurýdyń sıpattamalary aıqyndalǵan, sondaı-aq 2030 jylǵa qaraı 3,8 mln jańa jumys ornyn qurý boıynsha batyl maqsat qoıyldy. Sonymen qatar, memlekettik jumyspen qamtý baǵdarlamasy aýdıtiniń qorytyndysy boıynsha Joǵary aýdıtorlyq palatanyń baǵalaýyna sáıkes, túrli memlekettik baǵdarlamalar aıasynda qurylatyn jumys oryndarynyń kóbisi ýaqytsha ekeni anyqtaldy. Mysaly, «Qýatty óńirler – el damýynyń draıveri» ulttyq jobasy aıasynda ashylǵan 1,5 myń jumys ornynyń 90 paıyzy ýaqytsha, al «2021-2025 jyldarǵa arnalǵan agroónerkásip keshenin damytý» jobasy boıynsha 67 myń jumys ornynyń 81 paıyzy maýsymdyq sanalady. Tutastaı alǵanda, jańa jumys oryndarynyń 87%-y negizinen tómen jáne ortasha ónim beretin sektorlarda qurylady ári olar da ýaqytsha sıpatqa ıe», - dedi depýtat.
Onyń sózine qaraǵanda, bıyl joǵary oqý oryndary shamamen 74 myń, al kolledjder 143 myń jańa stýdentti qabyldady. Alaıda, oqýdy aıaqtaǵandardyń barlyǵyn jumysqa ornalastyrý eleýli túrde alańdatyp otyr.
«2023 jyly mamandyǵy boıynsha kolledj túlekteriniń 40%-y jumysqa ornalastyryldy. Bul rette, memlekettik organdar joǵary oqý oryndarynyń barlyq túleginiń jumysqa ornalasýynyń naqty jaǵdaıymen tanys emes. Bul túlekterdiń jumyssyzdar qataryn tolyqtyrýyna nemese kez kelgen jerde jumys isteı berýine alyp keledi. Olardyń bir bóligi memlekettik qoldaýǵa qaıta júginýge májbúr, oǵan taǵy da bıýdjet qarajaty jumsalady», - dedi Májilis tóraǵasynyń orynbasary.