«Turkvizyon-2015»: «Orda» toby ekinshi oryndy enshiledi

ASTANA. QazAqparat - Búgin Túrkııanyń Stambul qalasynda ıAhıa Kemal Beıatly mádenıet saraıynda «Turkvizyon-2015» konkýrsynyń grand-fınaly ótti. Oǵan bıyl 21 eldiń ánshileri qatysty. Sanaýly sát buryn márege jetken óner dodasynda Qazaqstannyń atynan shyqqan «Orda» toby 185 upaı jınap, ekinshi oryndy enshiledi. Qazaqstandyq ónersúıer qaýym bul erekshe konkýrsty «Habar» arnasy arqyly tamashalady.

Birinshi oryndy 194 upaımen Qyrǵyz eliniń ónerpazy Jeedesh Ydyrysova jeńip alsa, al úshinshi oryndy 175 upaımen Túrik eliniń Górkem Dýrmaz esimdi ánshisi oljalady.

Tórtinshi jáne besinshi orynda 165 upaıdan alǵan Makedonııa (gagaýz ultynyń ókili) men Sırııa tur.

Grand-fınalda Turkvizyon án baıqaýynyń tarıhynda tuńǵysh ret byltyrǵy saıystyń jeńimpazy Janar Duǵalova qonaq retinde án shyrqady.

Túrki tildes memleketterdiń mádenı-rýhanı baılanysyn nyǵaıtýdy kózdeıtin baıqaýǵa qazaq eli jyl saıyn qatysyp keledi. 2013 jyly Túrkııanyń Eskıshehır shaharynda 24 eldiń qatysýymen alǵash ret ótken saıysta qazaqstandyq «Rıngo» toby 9 orynnan kórinse, byltyr Tatarstan astanasy Qazan qalasynda ánshi Janar Duǵalova "Іzin kórem" ánin shyrqap, dúbirli dodanyń bas júldesin ıelendi.

Elimizde «Turkvizyon-2015» ulttyq kezeńiniń fınaldyq týry 6 qarashada Astana qalasynda Beıbitshilik jáne kelisim saraıynda ótti. Jeńimpaz sms-daýys berý jolymen tikeleı efırde anyqtaldy.

Ulttyq fınalǵa Ardaq Alekeshev, Albına Oganesıan, Azamat Bekbergenov, "Araı" toby, AIBOO, Baýyrjan Retbaev, Beıbit Qoshqalıev, Gúlmıra Jumabekova, Dıas Ablaev, Ergen Aıtymbetov, Qamar sulý, Marhaba Sábıeva, Raıym Ýaıys, Rýslan Berdimatov, Rústem Júginisov, "Saryn" toby jáne Hanaıym syndy ánshiler qatysty.

Turkvizyon - "Evrovıdenıe" baıqaýynyń túrki álemine arnalǵan balamasy. Baıqaýdyń aýdıtorııasy 300 mıllıon adamnan asady.