Bıyl da shirkeıler jergilikti turǵyndardy ábigerge sala bastady. Ásirese, Otyrar aýdanyna qarasty aýyl turǵyndary zııankesterden kóp zardap shegip jatyr. Áleýmettik jelide taraǵan aqparatqa súıensek, tańerteń oıanatyn shirkeıler adam denesiniń ashyq jerin shaǵyp tastaıdy. Sondyqtan jergilikti turǵyndar bet aýzyn tumshalap júrýge májbúr.
Túrkistan oblysy ákimdigi usynǵan aqparatqa súıensek, shirkeı oshaqtary Arys qalasy men Shardara, Otyrar aýdandarynda anyqtalǵan. Qazir Otyrardaǵy dárileý jumystaryna 30 maman men 11 tehnıka jumyldyrylyp otyr. Al, bıologtar naqty oshaqtardy belgilep, nusqaýlyq berip otyr.
— Túrkistan oblysynda shirkeılerge qarsy sharalar aýqymdy túrde jalǵasyp jatyr. Bıyl zııankestermen kúreske 1,4 mlrd teńge bólinip, dári kólemi úsh esege artty. Byltyr Syrdarııaǵa 40 tonna dári qoldanylsa, bıyl 120 tonna satyp alyndy. Qazirgi tańda ǵalymdar dáriniń tıimdiligin zerttep, shirkeı oshaqtaryn baqylap otyr. Jalpy, bıyl 5 gektardan asa aýmaqqa hımııalyq óńdeý júrgiziledi, — delingen ákimdik aqparatynda.
Bıolog Gaýhar Kemelbekovanyń aıtýynsha, jumys 28 naýryzdan bastalǵan, búginde dárileýdiń 7-kezeńi júrip jatyr. Alǵashynda bıologııalyq ádis qoldanylyp, arnaıy qaýipsiz reseılik preparat ózenderge quıylady. Eger nátıje bolmasa, eldi mekenderge hımııalyq ádis te qoldanylady. 21 sáýirden bastap aýyl ishine dári shashý bastaldy. Bul baǵytta 20-dan asa tehnıka jumys istep jatyr.
Aıta keteıik, budan buryn Túrkistan oblysy jyl saıyn shegirtkeden zardap shegetinin jazǵan bolatynbyz.