Túrkistandyq túlekter muqtaj otbasylarǵa baspana syılady
Igi iske Sozaq, Túlkibas, Ordabasy aýdandary men Túrkistan, Kentaý qalalarynyń jastary uıytqy boldy. Máselen, «Bekzat» shaǵyn aýdanynyń jigitteri muqtaj otbasyǵa, ıaǵnı 2020 jyly dúnıeden ótken dostary Jarqynbek Ótepovtiń otbasyna úı salyp berdi. Al Ordabasy aýdany Temirlan aýylynyń túlekteri jalǵyzbasty kópbalaly anaǵa 2 bólmeli páterdiń kiltin tabystady.
Igi is Sozaq aýdanynda da jalǵasyn tapty. Sozaq jáne Sholaqqorǵan aýylyndaǵy túlekter tartý etken 2 úı áleýmettik jaǵdaıy tómen otbasylarǵa berildi. Túlkibastyq jastar salǵan baspana jaldamaly páterde kúneltip júrgen jas otbasylarǵa tabys etildi.
Kentaý qalasyna qarasty Hantaǵy aýylynda ornalasqan A.Pýshkın atyndaǵy №6 jalpy orta mektebiniń túlekteri ózderi bilim alǵan mektepke sport alańshasyn salyp berdi. Odan bólek, bilim ordasynyń ishine rámizder alańyn jasap bergen.
Óńirde túlekterdiń tartýy álide jalǵasyp jatyr.