Túrkistandaǵy tehnologııalyq parkte 100-den astam turǵyn jumyspen qamtylady
Joba sheńberinde elektronıka, kompıýterlik jabdyqtar, elektr jabdyqtary, optıkalyq kabelder, turmystyq tehnıka jáne elektromobılderdi jóndeý men tehnıkalyq qyzmet kórsetý oryndaryn, sondaı-aq elektromobılderge arnalǵan qýattaý stantsııalaryn qurý kózdelip otyr. Osy arqyly ІT salasynda Túrkistannyń óz brendi qalyptaspaq.
Sonymen qatar tehnologııalyq parktiń quramynda osy ónimderge qyzmet kórsetý ortalyqtary men kadrlardy oqytý jáne damytý ortalyqtary da jumys isteıtin bolady. Bul ınnovatsııalyq ortalyq aımaqtaǵy joǵary tehnologııalar salasyn damytýǵa yqpal etip, jergilikti mamandardy daıarlaýda mańyzdy ról atqarady. Tehnologııalyq park tek óndiristik qýatty arttyrýmen shektelmeı, aımaqty jańa tehnologııalyq ınnovatsııalardyń ortalyǵyna aınaldyrýǵa, sheteldik ınvestıtsııalardy tartýǵa jáne óńirdegi ekonomıkalyq kórsetkishterdi jaqsartýǵa septigin tıgizedi. Joba júzege asqan jaǵdaıda, jańa jumys oryndary ashylady.
«Memleket basshysy bıylǵy joldaýynda elimiz tsıfrlandyrý salasyndaǵy qol jetkizgen jetistikterin eseleı túsýi tıistigin basa aıtqan bolatyn. Osyǵan oraı Túrkistan oblysynda birqatar qarqyndy jumys jalǵasýda. Túrkistan oblysy ákimi Darhan Satybaldy Qytaı Halyq Respýblıkasynyń ІT kompanııa ókilderimen kelissózder júrgizdi. Basqosýda kompanııa ókilderimen tehnologııalyq park ashý týraly kelisim-shartqa qol qoıyldy» - dedi oblystyq tsıfrlandyrý, memlekettik qyzmetter kórsetý jáne arhıvter basqarmasynyń basshysy Marat Aınabekov.