Túrkistandaǵy atyshýly jobanyń kóbine 2022 jyldan beri qarjy bólinbeı qalǵan – oblys ákimi

<p>Túrkistan oblysynyń ákimi Darhan Satybaldy ortalyq kommýnıkatsııalar qyzmetinde ótken brıfıngide ortalyqtaǵy atyshýly jobanyń kóbine 2022 jyldan beri qarjy bólinbeı qalǵanyn, sondyqtan olarmen baılanysty daý kóbeıip ketkenin aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Túrkistan oblysynyń damýyna memleket bıýdjetinen mıllıardtaǵan qarajat bólindi. Alaıda baǵanadan beri áriptesterim kóp jobanyń, nysandardyń qurylysy nege sozylyp ketkenin sizden surap jatyr. Ne sebepti dep, analız júrgizip kórdińizder me? Jalpy áleýmettik jáne ekonomıkalyq turǵyda oblys ortalyǵyn Túrkistanǵa kóshirý isi qanshalyqty ózin-ózi aqtady», - dep surady BAQ ókili.

Aımaq basshysy qazir óńirdiń ómiri 90 paıyz respýblıka bıýdjetinen túsetin qarajatqa táýeldi ekenin aıtty.

«Sheshim qabyldandy. Oblys ortalyǵy kóshken. Ary qaraı ortalyqty qalyptastyrýǵa jaı-jaı aqsha shyǵyndamaı, esh nárse bolmaıdy. Sol sebepti, kóptegen joba iske asyrylǵan. Bylaısha aıtqanda, solardyń kóbi 2022 jyly qarjylandyrýdan toqtap qalǵan dep aıtsaq bolady. Oǵan ózimizdiń jergilikti bıýdjettiń qarajaty jetpeıdi. 90 paıyzǵa jýyq respýblıkalyq bıýdjetke táýeldimiz. Sondyqtan, biz qazir ret-retimen sheship otyrmyz. Kópqabatty turǵyn úılerdiń qurylysy júrgizilse de, onyń jer astyndaǵy ınfraqurylymy áli bitpegen. Birinshi kezekte biz solardyń bárin bitirýimiz kerek. Qazirgi tańda kanalda qurylys jumystary jartylaı toqtap qalǵan. Kól jaıly da suraq qoıyldy. Ol da toqtap qalǵan. Ol da qarjynyń tapshylyǵyna baılanysty. Eger berip jatsa, onyń bárin jalǵastyramyz. Bekzat Sattarhanov atyndaǵy sport kesheniniń jobalyq-smetalyq qujattamalaryn qaıta qaraýǵa baılanysty sozyldy. Qaıtadan qaralǵannan keıin oǵan qaıtadan saraptama jasalýy kerek. Biraq oǵan bıyl 1 mlrd teńgeden astam qarjy bóldik. Ony bitiremiz», - dedi ákim.

Sondaı-aq, ol óńirdiń 2 mıllıonǵa jýyq turǵyny aýylda ómir súrip jatqanyn eske saldy.

«Jalpy durys sheshim. Óıtkeni fokýs bolady. Aýyldy jerlerge de qaraý kerek. Bizde 2,2 mln-ǵa jýyq halyq bolsa, sonyń 2 mln-ǵa jýyǵy aýyldy jerde turady. Endigi kezekte, jaqsy baǵdarlamalar iske asyrylyp jatyr. Bizdiń prezıdentimizdiń tapsyrmasyna sáıkes, «Aýyl el besigi» baǵdarlamasy aýyldy eldi mekenderge jetispeıtin ınfraqurylymdarmen qamtamasyz etý. Sonyń arqasynda biz mektepterge jóndeý jumystaryn júrgizip otyrmyz. Joq jerde jol salyp otyrmyz. Sonyń arqasynda halyqtyń gazyn, sýyn, jaryǵyn tartyp berdik. Árbir eldi mekende. Oǵan qyrýar qarjy jumsalyp jatyr. Odan bólek «Aýyl amanaty» baǵdarlamasy boıynsha aýyldy jerlerge nazar aýdaryp, aýyldaǵy jastarǵa ózderiniń tabysyn arttyrýǵa múmkindik berýdemiz», - dedi Darhan Satybaldy.