Túrkistanda Jerorta teńizinen jetkizilgen ósimdikter ósedi
Saıabaq ishindegi jabyq jylyjaıda ártúrli qurlyqtan jetkizilgen ósimdikterdiń 70-ke jýyq túri ósiriledi. Olardyń ishinde Jerorta teńizi, Latyn Amerıkasy, Eýropa, Ońtústik Shyǵys Azııa jáne taǵy basqa aımaqtardyń ósimdikteri bar.
Sondaı-aq, palma, fıkýs, tropıkalyq, shól, sýbtropıktik, tsıtrýs ósimdikterimen qamtylǵan. Saıabaqta qustar men balyqtar da bar.
Sonymen qatar, munda mektep oqýshylaryna bıologııa sabaqtaryn ótý múmkindigi qarastyrylǵan.
Saıabaqtyń jalpy alańy — 10,5 ga aýmaqty alyp jatyr. Demalys aımaǵynda skeıtbord alańdary, shahmat klýby, ózge de oıyn alańdary, budan bólek, 2 shaqyrym júgirý joly jáne velojoldar ornatylǵan.
Jańa saıabaqtyń ashylý saltanatyna qatysqan oblys ákimi Darhan Satybaldy qala turǵyndary men qonaqtaryn alda kele jatqan elimizdiń Táýelsizdik kúni merekesimen quttyqtady.
— Ózderińizge málim, osydan 6 jyl buryn jańa Túrkistan oblysy quryldy. Búginde Túrkistan tek oblys ortalyǵy retinde ǵana emes, túrki áleminiń rýhanı mádenı ortalyǵy bolyp qalyptasty. Túrli nysandar boı kóterip, shyn mánindegi ınfraqurylymy qalyptasqan jańa sáýletti qalaǵa aınaldy. Qalany abattandyrý jáne qala turǵyndary men qonaqtary úshin serýendeýge qolaıly jaǵdaı jasaý, sondaı-aq Túrkistan qalasynda jasyl jelekter alqabyn ulǵaıtý maqsatynda naqty jumystar atqarylýda, — dedi oblys ákimi Darhan Satybaldy.
Іs-sharaǵa elimizge tanymal óner juldyzdary — Madına Sádýaqasova, Ǵazızhan Shekerbekov, Mahmýd Ýrımbaev qatysyp, óner kórsetti.
Buǵan deıin habarlaǵanymyzdaı, búgin Táýelsizdik kúni qarsańynda 500-den asa túrkistandyq baspanaly boldy.