Túrkistanda «Jastar ortalyǵynyń» jańa ǵımaraty paıdalanýǵa berildi
– Túrkistan oblysy – demografııalyq ósimi joǵary aımaq. Sonyń ishindegi 14-35 jas aralyǵyndaǵy jastar sany 663 myńnan asyp, halyq sanynyń 30%-yn quraıdy. Túrkistan qalasynyń ózinde búginde 72 myńǵa jýyq jas turady. Bul – úlken demografııalyq kórsetkish jáne adam kapıtaly. Bıyl Túrkistan oblysynyń qurylǵanyna 6 jyl tolyp otyr. Osy az ǵana ýaqyt ishinde Túrkistan qalasynda jastarǵa qolaıly jaǵdaılar jasaý maqsatynda túrli mádenı, sporttyq nysandar boı kóterdi. Sonyń biri, mine, búgingi Túrkistan qalasynyń «Jastar resýrstyq ortalyǵy» ǵımaratynyń ashylý rásiminde jınalyp turmyz. Bul ǵımarat Túrkistan jastaryna shabyt berip, elge qyzmet etetin jastardy biriktiretin ortalyq bolady dep senemin. Jastardyń ǵımaraty qutty bolyp, bastamashyl ortalyqqa aınala bersin! - dedi oblys basshysy.
Jastar ortalyǵyna arnalǵan bul nysan jergilikti bıýdjet esebinen boı kóterdi. Sáýleti men saltanaty kelisken ǵımarat táýligine 100-den asa jasqa qyzmet kórsetedi. Onda jastarǵa bilimin kóterip, salaýatty ómir saltyn ustanýǵa, shyǵarmashylyqpen aınalysýǵa barlyq jaǵdaı jasalǵan. Ortalyq arnaıy demalys aımaǵy, strıt-vorkaýt alańy, elektrondy kitaphana bólmesi, úıirmelerge arnalǵan bólmeler, shaǵyn sportzal jáne kópfýnktsıonaldy zaldarymen qamtamasyz etilgen. Eriktilerge arnaıy úlken zal men kınoteatr da qarastyrylǵan. Odan bólek, ortalyq janynan amfıteatrdyń qurylys júrgizilip jatyr.
Aıta keteıik, Túrkistan qalasynda 14-35 jas aralyǵynda 71 486 jas bar. Qaladaǵy 2 joǵarǵy oqý orynda 12 265 stýdent bilim alyp jatyr. 8 orta arnaýly oqý oryndarynda stýdentter sany – 7 441. Túrkistan qalasy boıynsha jalpy orta mektepterde 7-11 synyptarda 18 844 oqýshy bilim alyp jatyr.