Túrkistanda shoshqa jetektegen belsendiler jaýapqa tartyldy

<p>TÚRKІSTAN. KAZINFORM - Polıtsııa belsendilerge ákimshilik quqyq buzýshylyq týraly kodekstiń eki baby boıynsha shara qoldandy.</p>

Áleýmettik jelide taraǵan aqparatqa súıensek, shoshqanyń toraıyn jetektegen eriktiler qaladaǵy dúkenderdiń birine kirip, saýda zalynda janýardy merzimi ótip ketken taýarlarmen tamaqtandyrǵan.

Vıdeodaǵy kadrlarda belsendilerdiń bul áreketi anyq kórinedi. 

Atalǵan jaǵdaı boıynsha polıtsııa qyzmetkerleri tekserý júrgizip, belsendilerge ákimshilik quqyq buzýshylyq týraly kodekstiń eki babymen shara qoldandy. 

Atap aıtar bolsaq, «aýyl sharýashylyǵy janýarlaryn jaıý qaǵıdalaryn buzý» men «bótenniń múlkin qasaqana joıý nemese búldirý». 

- Jınalǵan materıaldar protsessýaldyq sheshim qabyldaý úshin sotqa joldandy. Sonymen qatar atalǵan fakti boıynsha materıaldar zańdy sheshim qabyldaý úshin Túrkistan qalasynyń sanıtarlyq-epıdemıologııalyq baqylaý bólimine jiberildi, - delingen Túrkistan oblysy polıtsııa departamentiniń baspasóz qyzmeti usynǵan aqparatta.

Aıta keteıik, budan buryn Túrkistan ákimdigi kásipkerge 27 mln tenge turaqsyzdyq aıybyn tólegenin jazǵan bolatynbyz.