Túrkistanda is júzinde jumysqa turmaǵan adamdarǵa 130 mln teńge tólengen

<p>ASTANA. KAZINFORM - Túrkistannyń eńbek mobıldiligi ortalyǵynda is júzinde jumysqa turmaǵan adamdarǵa 130 mln teńge tólengen. Bul týraly Qarjylyq monıtorıng agenttiginiń baspasóz qyzmeti habarlaıdy.&nbsp;</p>

Qarjylyq monıtorıng agenttigi oblys prokýratýrasynyń úılestirýimen Halyqty jumyspen qamtý salasy boıynsha bólingen bıýdjet qarajatyn talan-tarajǵa salý derekterine qatysty birneshe qylmystardy áshkerelegen. 

Oblystyq jumyspen qamtýdy úılestirý jáne áleýmettik baǵdarlamalar basqarmasynyń «Eńbek mobıldiligi ortalyǵy» KMM-niń qyzmetkerleri memleketke 130 mln teńgeden astam zalal keltirgen.

«Eńbek mobıldiligi ortalyǵy» KMM-niń jaýapty tulǵalary «2021-2025» jyldarǵa arnalǵan kásipkerlikti damytý jónindegi ulttyq jobasy» aıasynda sýbsıdııalanǵan jumys oryndaryna qatysýshy tulǵalardyń jalaqylaryn tóleý barysynda, birqatar kásiporyndardyń basshylarymen adamdar toby bolyp sóz baılasa otyryp, mekemelerde is-júzinde jumys jasamaıtyn 132 azamattyń jeke derekterin «Eńbek naryǵy» avtomattandyrylǵan aqparattyq júıesine engizip, olarǵa aýdarylǵan aılyq jalaqylaryn ıemdenip otyrǵan. 

Aıta keteıik, buǵan deıin Túrkistan oblysynda «Jaıly mektep» qurylysyn jospardan keshiktirgender eskertý alǵany týraly jazǵan edik.