Túrkistanda komıssııa otyrysy kezinde ákimdik qyzmetkeri balabaqsha ıesine qol kótergen

<p>TÚRKІSTAN. KAZINFORM &mdash; Túrkistan oblystyq bilim basqarmasynda ótken komıssııa otyrysynda&nbsp; balabaqsha ıesine kúsh qoldanǵan. Bul sáttiń vıdeosy otyrystyń túsirilimi kezinde túsip qalǵan. Bul týraly Otyrar.kz jazdy.&nbsp;</p>

Beınejazbany Túrkistan qalalyq máslıhat depýtaty Sáken Handıllaev Facebook paraqshasynda jarııalady.

«Ákimdikten pana, kómek surap kelip jatqan halyq kelip, taıaq jep ketip jatsa, «Memlekettik qyzmet týraly» zań buǵan ne deıdi? QR Memlekettik qyzmet isteri agenttigi buǵan ne deıdi, álde memlekettik qyzmetkerlerge arnalǵan zań tek aýdandar men aýyl ákimshilikterinde qyzmet jasaıtyn jáı mamandarǵa ǵana qoldanyla ma», — dep jazdy avtor.

Bul jaıt oblystyq bilim basqarmasynda ótken balabaqshalar jónindegi komıssııa otyrysy kezinde bolǵan. Soqqyǵa jyǵyldym degen áıel balabaqsha ıesi eken. Otyrys kezinde áıel azamattary arasynda janjal týyndaǵan. Vıdeodan ákimdik qyzmetkeriniń balabaqsha ıesine ashýlanyp, keıin julqylap, qol kótergenin kórýge bolady.

«Sońǵy úsh-tórt jyldan beri áıelderge qatysty zorlyq zombylyq jasaǵandarǵa qarsy zańdardy qatańdatý boıynsha memlekettik deńgeıde talqylanýlar bolyp, nátıjesinde Zańǵa qol qoıylyp, bekitildi. Ol zańǵa sáıkes, áıelderge qol kótergeni úshin 3- 8 jyl aralyǵynda qylmystyq jaýapkershilikke deıin tartylatyn sekildi. Al osyndaı áıel kisini, memlekettik organnyń ishinde, memlekettik qyzmetker dúıim jurttyń kóz aldynda uryp- soǵyp jibergeni úshin sot 10 AEK kóleminde aıyppul qaraıdy eken. Al osy áıel kisi otbasynda osyndaı shapalaq jese, kúıeýi 20 táýlikke qamalar edi. Osyndaı jaǵdaılarǵa qarap, memlekettik qyzmetkerge áıelderdi urýǵa artyqshylyqtar berilgen be degen oı keledi», - dep jazdy máslıhat depýtaty Sáken Handıllaev.

Balabaqsha ıesi ákimdik qyzmetkeriniń ústine aryzdanǵan. Oblystyq Polıtsııa departamentiniń málimetinshe, aryz Ákimshilik quqyq buzýshylyq týraly kodekstiń 73-2-baby 1-tarmaǵy (Uryp-soǵý) boıynsha tirkelip, is materıaldary sotqa joldanǵan.

Joǵarǵy sottyń resmı saıtyndaǵy málimetke súıensek, atalǵan is Túrkistan qalasynyń ákimshilik quqyq buzýshylyqtar jónindegi mamandandyrylǵan sotynda qaralǵan. Sot qaýlysymen ákimdik qyzmetkerine 10 aılyq eseptik kórsetkish mólsherinde aıyppul salynǵan.

Túrkistan oblystyq ákimdigindegiler balabaqsha ıesine kúsh qoldandy degen áıel ákimdiktiń ishki aýdıt qyzmetiniń bas ınspektory ekenin aıtty. Atalǵan oqıǵadan keıin qyzmetkerden túsinikteme alynyp, ádep normalaryn saqtamaǵany úshin oǵan qatań sógis berilipti.