Túrkistanda kezekte turǵan 100-ge jýyq turǵynǵa baspana, jastarǵa ǵımarat tapsyryldy
Turǵyndardyń qýanyshyn bólisýge Túrkistan oblysynyń ákimi Darhan Satybaldy arnaıy baryp, páter ıelerine izgi nıetin bildirdi.
– Búgin sizdermen erekshe qýanyshty sátte kezdesip turmyz. Ózderińiz bilesizder, Túrkistan oblysy qurylyp, Túrkistan qalasynyń oblys ortalyǵy atanǵanyna 6 jyl toldy. Osy aıtýly mereke aıasynda búgingi is-sharany josparlaǵan bolatynbyz. Bul úılerdi kásipkerler naryqqa satamyz dep salǵan bolatyn. Biz bıýdjetten qarjy taýyp, kásipkerlermen kelisip, úılerdiń baǵasyn tómendetip, arnaıy satyp aldyq. Sóıtip shahardaǵy muqtaj azamattarǵa berý týraly sheshim qabyldadyq. Kórip tursyzdar, úıler men aýlasy óte yńǵaıly, ádemi. Aınalasyn taza ustaý óz qoldaryńyzda. Sizdermen birge ózimiz úı alǵandaı qýanyp jatyrmyz. Bul jumystar Memleket basshysy Qasym-Jomart Kemelulynyń turǵyndardy baspanamen qamtý tapsyrmasy aıasynda atqarylyp otyr. Shańyraqtaryńyz berekeli ári baqytqa, shattyqqa toly bolsyn! – dedi Darhan Satybaldy.
Elıtaly bolyp sanalatyn úsh qabatty «ıAssaýı» turǵyn úı kesheniniń aýmaǵynda balalar oıyn alańshasy, kólik turaǵy bar jáne ınfraqurylymmen tolyq qamtamasyz etilgen.
Oblys ortalyǵynda turǵyn úı keshenderiniń qurylysy jalǵasyp jatyr. Bıyl bıýdjet esebinen 41, jeke ınvestorlar esebinen 24 kópqabatty turǵyn úı salý kózdelgen. Sonymen qatar osy jyly jalpy 191 úı salý jospary bekitildi. Búginde 159 turǵyn úıdiń qurylysy júrgizilip jatyr. Olardy jyl sońyna deıin paıdalanýǵa berý josparlanǵan. Jalpy, Túrkistan qalasy halyqty baspanamen qamtý baǵytynda elimizde aldyńǵy qatarda. Oblys ortalyǵynda sońǵy 5 jylda turǵyn úı kezeginde turǵan 2558 azamat baspanaly boldy.
Sonymen birge búgin Túrkistan qalasynda «Jastar ortalyǵynyń» jańa ǵımaraty paıdalanýǵa berildi. Saltanatty sharaǵa qatysqan Túrkistan oblysynyń ákimi Darhan Satybaldy túrkistandyq jastarǵa zamanaýı ortalyqtyń kiltin tabystap, ár bastamalaryna sáttilik tiledi.
Jastar ortalyǵyna arnalǵan bul nysan jergilikti bıýdjet esebinen boı kóterdi. Sáýleti men saltanaty kelisken ǵımarat táýligine 100-den asa jasqa qyzmet kórsetedi. Onda jastarǵa bilimin kóterip, salaýatty ómir saltyn ustanýǵa, shyǵarmashylyqpen aınalysýǵa barlyq jaǵdaı jasalǵan. Ortalyq arnaıy demalys aımaǵy, strıt-vorkaýt alańy, elektrondy kitaphana bólmesi, úıirmelerge arnalǵan bólmeler, shaǵyn sportzal jáne kópfýnktsıonaldy zaldarymen qamtamasyz etilgen. Eriktilerge arnaıy úlken zal men kınoteatr da qarastyrylǵan.
Aıta keteıik, Túrkistan qalasynda 14-35 jas aralyǵynda 71 486 jas bar. Qaladaǵy 2 joǵarǵy oqý orynda 12 265 stýdent bilim alyp jatyr.