Túrkistanda ekologııalyq aktsııa aıasynda jalpyhalyqtyq senbilik ótti
Jalpy 1 myńnan asa azamat kıeli qaladaǵy «Jeńis» saıabaǵy jáne ózge de demalys oryndarynda tazalyq jumystaryn júrgizdi. Shara maqsaty – rýhanı astana turǵyndaryn tazalyqqa úıretip, qalanyń keleshegi úshin árbir azamattyń eńbek etýi mańyzdy ekenin túsindirý.
– «Bizder, ıaǵnı qalanyń aldyńǵy býyn ókilderi, myna jastarǵa úlgi bolýymyz kerek. Sol úshin de aýqymdy tazalyq sharasyna bilek sybana kiristik. Senbilik jumystaryn «Jeńis» saıabaǵynan bastaýymyzda mán bar. Sebebi, dál osy demalys aımaǵy qala qonaqtary da, turǵyndary da jıi keletin oryn. Sondyqtan da qala jastaryn, turǵyndaryn tazalyq naýqanyn jumyla qoldaýǵa shaqyramyn», - dedi oblystyq aqsaqaldar alqasynyń tóraǵasy Jarylqasyn Áziretbergenov.
Sharaǵa qatysýshylar senbilikte belsendilik tanytyp, tazalyq mádenıetin qalyptastyrýǵa atsalysty.
– «Qalamyzda jyl basynan beri júrip jatqan ekoaktsııa aıasynda aýqymdy senbilikter turaqty uıymdastyrylyp keledi. Osy jumystar arqasynda turǵyndar arasynda tazalyq mádenıeti qalyptasyp kele jatqanyn ańǵarýǵa bolady. Qala turǵyndaryn tazalyq sharalaryna birlese kirisýge shaqyramyz», - dedi sharaǵa qatysqan Túrkistan oblystyq maslıhatynyń depýtaty Inara Namazbaeva.
Sáýir aıynda Memleket basshysy Qasym-Jomart Kemelulynyń bastamasymen qolǵa alynǵan «Taza Qazaqstan» respýblıkalyq ekoaktsııasy aıasynda Túrkistan qalasynda kóptegen jumys atqaryldy. Búgingi kúnge deıin 100-den asa tazalyq sharalary ótkizilip, ár apta saıyn 10 myńǵa jýyq turǵyn senbilik jumystaryn júrgizdi.
Jalpy, Túrkistan qalasynda sanıtarlyq tazalyqpen qamtamasyz etilgen 875 kóshe bar. Kútip-ustaý jumystary turaqty júrgizilýde. Onyń ishinde 136 kóshe mehanıkalyq jolmen tazalanady. Qala aýmaǵy 6 sektorǵa bólingen. Búginde shaharda 32 saıabaq, 32 demalys alleıasy bar. Oblys ortalyǵyndaǵy kógaldy aımaq búginde 262 gektarǵa jetken. Aktsııa aıasynda 1 mıllıonǵa jýyq kóshet otyrǵyzylyp, 8 gektar jerge gúl egildi.