Túrkistanda bazarda kitaphana ashyldy
Túrkistan qalasyndaǵy «Qýanysh» saýda ortalyǵynda «Farab» kitaphanasynyń pýnkti ashyldy.
Jańa rýhanııat ordasynyń ashylý saltanatyna jergilikti zııaly qaýym ókilderi men kásipkerler jáne oblys ákiminiń orynbasary Beısen Tájibaev qatysyp, kóptiń qýanyshymen bólisti.
«Halyq kóp shoǵyrlanǵan orynda bilim berý jáne mádenı platforma qurý maqsatynda «Bazardaǵy kitaphana» ıdeıasy týyndap, búgin iske asyp otyr. Bul jobany oblys ákimi Darhan Satybaldy qoldap, qoǵam mádenıetin damytý baǵytynda júıeli sharalar uıymdastyrýdy tapsyrdy. Ózderińizge belgili, óńirde turǵyndardyń basym kópshiligi saýda núkteleri arqyly kásibin dóńgeletýde. Qarapaıym halyqtyń da jıi keletin orny – bazar. Sondyqtan da osyndaǵy kásipkerlerdiń kitap oqyp, iskerlik turǵydan izdenýine qoldaý bildirip, mádenı ortany keńeıtý maqsatynda tyń jobany bastadyq», – dedi oblys ákiminiń orynbasary.
Munda túrli baǵyttaǵy kórkem ádebıetter men kásipti nyǵaıtýǵa baǵyttalǵan jáne jiger beretin álemdik bestsellerden quralǵan 3 myńǵa jýyq kitap qory bar. Bul týyndylar kásipkerlerge óz bıznesin damytýǵa, tulǵa retinde qalyptasýyna úles qosyp qana qoımaı, jańa ári kreatıvti ıdeıalardyń týýyna múmkindik bermek. Halyqtyń suranysyna saı kitap sóreleri turaqty túrde jańartylyp otyrady. Sonymen qatar arnaıy qatarlar nemese shkaftar ornatylyp, sol jerde azamattar oqyǵan kitaptaryn syıǵa qaldyrady nemese basqa kitaptarmen almastyryp oqı alady.
«Qaladaǵy eń úlken «Qýanysh» saýda ortalyǵynda 1700-den astam kásipker jumys isteıdi. Kúnine orta eseppen 20 myńnan astam adam keledi. Búgingi ashylyp jatqan kitaphana bir kúnde 70 adamǵa deıin qyzmet kórsetedi, aıyna orta eseppen 1500 adam qamtıdy dep josparlanýda. Mundaı tyń jobany ári qaraı da aýdan, qalalardaǵy ortalyq bazarlarda jalǵastyratyn bolamyz. Qoǵamdy kitap oqýǵa qyzyqtyratyn jańa jobalardyń jandanýy oqyrmannyń kóbeıýine tikeleı áser etedi. Bastamamyzǵa qoldaý bildirgen bazar ıelerine alǵysymdy bildirgim keledi» - dedi Beısen Tájibaev.
Aıta keteıik, óńirde jalpy 39 bazar jumys isteıdi.