Túrkistanda alǵashqy jaıly mektep paıdalanýǵa berildi
Túrkistan qalasynyń jańa qala aýmaǵynda salynǵan 4 qabatty bilim ordasynda fızıka, hımııa, bıologııa jáne robototehnıka kabınetteri zamanaýı jabdyqtarmen jabdyqtalǵan. Bilim alýshylardyń jan-jaqty damýy úshin mektepte sport zaldary, sheberlik zaldary, zerthanalar men demalys aımaqtary uıymdastyrylǵan. Joǵary jyldamdyqtaǵy ınternetke qosylǵan. Bastaýysh pen joǵary synyp oqýshylary jekelegen bloktarda oqıdy. Balalardyń jas ereksheligine oraı bloktardyń árqaısysy oqý synyptarymen, sanıtarlyq toraptarmen, sport zaldarymen jáne jekeshelegen kishkene shkaftarmen qamtylǵan. Erekshe qajettiligi bar balalar úshin ınklıýzıvti kabınetter, pandýstar, jedel satylar, arnaıy beıimdelgen ájethanalar salynǵan.
«Bıyl oblysymyzda jalpy syıymdylyǵy 17 800 oryn 29 jaıly mekteptiń qurylysy júrgizilip jatyr. Búgin onyń alǵashqysyn ashqaly otyrmyz. Sizderdiń mektepterińiz jaı ǵana jańa ǵımarat emes. Bul – damý men oqý úshin tamasha jaǵdaılar jasalǵan oryn. Elimizdiń bolashaǵy – bilimdi urpaqtyń qolynda. Olardyń oqýda ozat bolyp, qoǵamnyń barlyq salasynda bıik belesterdi baǵyndyrýyna tilektespin. Jańa bilim ordasynyń ashylýy qutty bolsyn!» – dedi Darhan Satybaldy.
Jańa bilim ordasy qalada ornalasqan 2 mekteptegi júktemeni azaıtýǵa múmkindik beredi. Birinshi kezekte munda №28 mektep-lıtseıiniń oqýshylary kóship keldi. Qazirgi tańda 66 pedagog aýysý tártibimen, 7 pedagog konkýrstyq tártippen jumysqa qabyldandy. Oqýshy sanynyń tolyǵýyna qaraı ózge de ustazdar konkýrstyq rásimmen qyzmetke ele alady. Bilikti ustazdar arnaıy iriktelgen. Budan bólek, qarjy, sharýashylyq qyzmetkerleri jumysqa alynǵan.
Túrkistan oblysynda 120 myńǵa jýyq jumys orny ashylǵanyn jazǵan bolatynbyz.