Túrkistanda 15 jastaǵy qyzǵa azǵyndyq jasaǵan kúdikti qamaýǵa alyndy
Qoǵam belsendisi Qural Seıithanulynyń jazýynsha, oqıǵa Túrkistan qalasynda bolǵan. Kópbalaly ananyń 15 jastaǵy qyzyn 33 jastaǵy er adam qorqytyp, zorlaý áreketterin jasaǵan. Jańa qala shaǵyn aýdanyndaǵy kóp qabatty turǵyn úılerdiń birine aparyp, sheshindirip sýretke túsirgen. Sońynda jynystyq qatynasqa túsken. Kúdikti munymen de toqtamaı qorqytyp, bopsalaǵan. Qyzdyń telefonyna habarlama jibergen ol, jynystyq qatynasqa túsetin jas qyz taýyp berýin talap etken jáne 50 000 teńge suraǵan. Áıtpese jalańash fotolaryńdy jelige júkteımin dep qorqytypty.
«Ózin UQK-niń qyzmetkerimin dep tanystyrǵan. Shyn máninde eshqandaı da qyzmetker emes. Qazirgi ýaqytta qyzǵa azǵyndyq jasaǵan adam qamaýǵa alyndy. Onyń telefonynan 15-ke jýyq kámeletke tolmaǵan jas qyzdyń jalańash fotolary tabylǵan. Kóptegen kishkentaı qyzdar bastarynda bolyp jatqan osyndaı sumdyqtardy ata-analarynan qorqyp aıta almaı tunshyǵyp júredi eken. Sondyqtan qyzdaryńyzdy jıi baqylap otyryńyzdar. Qyzdardyń telegramm chattarǵa qosylmaýyn qadaǵalaý qajet» - dep jazdy Qural Seıithanuly.
Al, Túrkistan oblysy polıtsııa departamentiniń baspasóz qyzmeti jergilikti turǵynnyń kámeletke tolmaǵan qyzǵa qatysty quqyqqa qarsy is-áreketi boıynsha qylmystyq is qozǵalǵandyǵyn jetkizdi.
«Kúdikti ustalyp, ýaqytsha ustaý ızolıatoryna qamaýǵa alyndy. Qazirgi ýaqytta bolǵan oqıǵanyń mán-jaıyn anyqtaýǵa baǵyttalǵan jedel-tergeý sharalary júrgizilip jatyr. Sonymen qatar kámeletke tolmaǵan jasóspirimniń jalańash fotosýretteri týraly taralǵan aqparat shyndyqqa janaspaıdy. Polıtsııa azamattardy tek resmı derekkózderge senýge shaqyrady. QR QPK-niń 201-babyna sáıkes tergeý múddesindegi ózge de aqparattar jarııalaýǵa jatpaıdy», - delingen vedomstvo aqparatynda.
Eske sala keteıik, buǵan deıin Qyzylordada oqýshyny seks quldyqqa salǵan kúdiktilerdiń beseýi — jasóspirim bolyp shyqqanyn jazǵan edik.