Túrkistan túrki áleminiń týrıstik astanasyna aınaldy — Dımash Qudaıbergen
Túrkistan oblysynyń ákimi Darhan Satybaldy elimizdiń atyn álemdik arenada tanytyp júrgen jas ónerpazdyń aldaǵy jumystaryna sáttilik tiledi. Sondaı-aq, bul sapardyń Ońtústik óńiriniń rýhanııat salasyna, óńir týrızmin damytýǵa zor serpin beretindigin aıtyp ótti.
«Qazirgi tańda, óńirde rýhanııat salasynda birqatar bastamalar qolǵa alynyp, júzege asyp jatyr. Respýblıkalyq, halyqaralyq deńgeıdegi sharalar — óńirimizge týrısterdiń, qadirli qonaqtardyń kelýine sebep bolyp otyr. Solardyń biri — «Voice of Turan» halyqaralyq qazaq ánderin oryndaýshylar baıqaýy. Bıyl 5-shi ret uıymdastyrylyp otyrǵan baıqaýda álemniń 20-ǵa jýyq elinen ónerpaz qatysyp, qazaq ánderin shyrqaıdy. Osy baıqaý barysynda álemniń qaı elinde bolmasyn ánshilerdiń Sizdiń oryndaǵan ánderińizge degen qyzyǵýshylyǵy basym ekendigi baıqalady. Bul — biz úshin qýanysh ári zor jaýapkershilik», — degen oblys ákimi ánshini halyqaralyq qazaq ánderin oryndaýshylar baıqaýyna qurmetti qonaq bolýǵa shaqyrdy.
Ánshi óz sózinde Túrkistannyń rýhanı ortalyq retinde qaryshtaýyna tańdanysyn jetkizip, óńir basshysyna alǵysyn jetkizdi.
«Túrkistannyń jańa keıpine, ózgeriske tań qaldym. Barlyǵy unap jatyr. Es bilgeli alǵash ret kelýim, erekshe áser aldym. Eldiń osyndaı ádemi shaharda turyp jatqanyn, eńsesi kóterilip jatqanyn kórgenime qýanyp otyrmyn. Túrkistan búginde túrki áleminiń týrıstik astanasyna aınalyp, dúnıe júzine tanylyp jatyr. Eń bastysy elimiz tynysh bolsyn! Qalalarymyz álemge tanylyp, halqymyzdyń dúnıetanymy, rýhanııaty kókjıegi keńeıe bersin!» — dedi Dımash Qudaıbergen.
Aıta keteıik, 13-14 qyrkúıekte Astanada Dımash Qudaıbergenniń kontserti ótedi. Qazaqstannyń halyq ártisi «Astana Arena» stadıonynda «Stranger» atty jeke kontsertinde óner kórsetedi. Ulttyq dybystyq jáne qazirgi áýendik tehnıka úılesim tapqan álemdik deńgeıdegi shoýda dástúrli jáne zamanaýı stıldegi kompozıtsııalar oryndalady. Án keshi 8-13 qyrkúıek aralyǵyna josparlanǵan V Dúnıejúzilik kóshpendiler oıyndary aıasynda Mádenıet jáne aqparat mınıstrliginiń qoldaýymen, «DımashAlı» shyǵarmashylyq ortalyǵynyń uıymdastyrýymen ótkiziledi.