Túrkistan turǵyny arystan men jabaıy qustardy úıinde asyraǵan

<p>TÚRKІSTAN. KAZINFORM — Túrkistan oblysynda polıtsııa turǵynnyń úıinen arystan men jabaıy qustardy tárkiledi. </p>

Jedel-izdestirý is-sharalarynyń nátıjesinde Túrkistan oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri sırek kezdesetin janýarlar men qustarǵa qatysty zańsyz áreket jasaý faktisin anyqtady.

Naqtyraq aıtsaq, jedel ýákilder Saryaǵash aýdany turǵyndarynyń biriniń úıine tekserý júrgizip, aýlasynan bir arystan, eki búrkit, suńqar, eki úki jáne eki kekilik qusyn tárkiledi.

Er adam jabaıy ańdardy óz qajettigi úshin asyraǵanyn jetkizdi.

Tárkilengen janýarlar Shymkent qalasyndaǵy zoobaqqa ornalastyryldy.

Qazirgi ýaqytta osy fakt boıynsha qylmystyq is qozǵalyp, tıisti tergeý áreketteri júrip jatyr.  

Bolǵan oqıǵanyń búkil mán-jaıy anyqtalyp jatyr.