Túrkistan oblysynyń Tólebı aýdanyna jańa ákim taǵaıyndaldy

<p>TÚRKІSTAN. KAZINFORM&nbsp;&mdash; Qazaqstan Respýblıkasy Prezıdenti Ákimshiliginiń jáne Tólebı aýdany máslıhaty depýtattarynyń kelisimderi boıynsha, Túrkistan oblysy ákiminiń ókimimen Tólebı aýdanynyń ákimi bolyp Erkeǵalı Amantaıuly Álimqulov taǵaıyndaldy. Túrkistan oblysynyń ákimi Darhan Satybaldy jańa ákimdi aýdan aktıvine tanystyrdy.</p>

Oblys ákimi jańadan taǵaıyndalǵan aýdan ákimine basty nazar aýdaryp, atqarýdy qajet etetin birqatar máseleler mindettedi. Prezıdent Qasym-Jomart Toqaevtyń aıqyndap bergen baǵytta halyqpen tyǵyz baılanysta jumys isteýdi, aýdanda jańa óndiris oryndaryn ashyp, turǵyndardy jumyspen qamtamasyz etý, ınvestıtsııalar men ozyq tehnologııalar tartyp, óndiriletin ónim kólemin arttyrý boıynsha jumystardy júrgizýdi júktedi. Eń aldymen, aýdan turǵyndaryna barynsha qolaıly turmystyq jaǵdaılar jasap, aýyl, eldi mekenderi jaıly, qaýipsiz, taza ári kórikti aýmaqqa aınaldyrýdy tapsyrdy.

Foto: Túrkistan oblysy ákimdigi

«Búgin aýdandyq máslıhatynyń sessııasyna Tólebı aýdany ákimi qyzmetine jańa kandıdatýra usynylyp, depýtattar tarapynan qoldaý taýyp otyr. Bizdiń basym baǵyttarymyz belgili. Ol — óndiris oryndary men zaýyttar ashý, ınvestıtsııa tartý. Oǵan qosa Tólebı aýdanynda aýyl sharýashylyǵy men týrızmdi damytý kerek. Múmkindik mol. Jumysty shıratý kerek. Uzaq jyldar boıy memlekettik jáne basshylyq qyzmetterde shyńdalǵan Erkeǵalı Amantaıuly bul baǵytta júıeli is atqarady dep senemin. Aýdannyń damý josparyn naqtylap, jalpy ónim kólemin, ózindik kiristerdi arttyrý kerek», — dedi Darhan Satybaldy.

Erkeǵalı Álimqulov 1981 jyly, 6 maýsymda Tólebı aýdanynda dúnıege kelgen. Bilimi joǵary, mamandyqtary: keden isi, quqyqtaný, ekonomıka.

Foto: Túrkistan oblysy ákimdigi

Eńbek jolyn 2003 jyly jyly QR Tabıǵı monopolııalardy retteý agenttigi aımaqtyq bólimshelerdiń jumysyn úılestirý basqarmasynda jetekshi maman retinde bastaǵan. 

QR Indýstrııa jáne saýda mınıstrligi Básekelestikti qorǵaý komıtetinde, Básekelestikti qorǵaý agenttiginde jumys istegen. Qazaqstan Respýblıkasy Prezıdenti Ákimshiligi Memlekettik baqylaý jáne aýmaqtyq-uıymdastyrý bóliminiń memlekettik ınspektory, Ońtústik Qazaqstan oblysy ákimi apparatynyń basshysy, QR Parlamenti Májilisiniń uıymdastyrý-baqylaý jáne kadr jumysy bóliminiń meńgerýshisi, Shymkent qalasy ákimi apparatynyń basshysy, QR Ulttyq ekonomıka mınıstrligi kásipkerlikti damytý departamentiniń dırektory, «AMANAT» partııasynyń Nur-Sultan qalalyq fılıaly atqarýshy hatshysynyń orynbasary boldy.

2022 jyly Astana qalasy ákimdiginiń «Astana» Áleýmettik-kásipkerlik korporatsııasy» aktsıonerlik qoǵamynyń Basqarma tóraǵasy boldy.

2023 jyldyń qańtar aıynan beri Túrkistan oblysy ákimi apparatynyń basshysy qyzmetin atqaryp keldi.

Buǵan deıin túrkistandyqtardy shet memleketterge jumysqa ornalastyratyn ortalyq ashylǵany habarlandy.