Túrkistan oblysynyń sýarmaly jerlerine 206 mln tekshe metr sý jiberildi

<p>ASTANA. KAZINFORM &ndash; Túrkistan oblysynyń sýarmaly jerlerine 206 mln tekshe metr sý jiberildi. Bıylǵy sýarý maýsymyna daıyndyq aıasynda topyraq quramyndaǵy ylǵal mólsherin arttyrý boıynsha is-sharalar júrgizilip jatyr. Bul týraly QR Sý resýrstary jáne ırrıgatsııa mınıstrligi habarlady.</p>

Qysqy maýsymda Maqtaaral aýdany boıynsha 47 myń gektardan astam sýarmaly jerge sý berý josparlanyp otyr. Búgingi tańda 12 myń gektarǵa nemese sýarmaly alqaptyń 25 paıyzynda ylǵaldatý jumysy júrgizildi. Al, Jetisaı aýdanynda ylǵaldatý josparlanǵan 54 myń gektardyń 10 myń gektaryna (19%) sý berildi.

Aıta ketý kerek, «Dostyq» kanaly boıynsha sý alý lımıti 1116,0 mln. tekshe metrdi quraıdy. Onyń ishinde jeltoqsan-naýryz aralyǵyndaǵy ylǵaldatý jumystaryna 486,8 mln. tekshe metr qarastyrylǵan. Búgingi tańda atalǵan kanal arqyly osy maqsatta 88,98 mln. tekshe metr mólsherinde sý alyndy.

«Túrkistan oblysynyń sýarmaly jerlerine qysqy mezgilde sý berilip jatyr. Bul egis alqaptaryndaǵy ylǵal mólsherin kóbeıtýge, topyraqtyń qunarlyǵyn jaqsartýǵa jáne aýyl sharýashylyǵynyń ónimdiligin arttyrý úshin jasalady. Jetisaı jáne Maqtaaral aýdandaryndaǵy ylǵaldatý jumysyn naýryz aıyna deıin aıaqtaý josparlanyp otyr»,- dedi Sý resýrstary jáne ırrıgatsııa mınıstri Nurjan Nurjigitov.