Túrkistan oblysynyń Ordabasy aýdanynda ınvest-joba arqyly 500-den astam adam jumyspen qamtyldy

<p>TÚRKІSTAN. KAZINFORM &ndash; Ordabasy aýdanynda bıylǵy jyldyń 6 aıynda 3 ınvestıtsııalyq joba iske qosyldy. Jalpy quny 4,2 mıllıard teńgeni quraıtyn bul ónerkásip oryndarynda 533 jańa jumys orny ashylyp otyr.&nbsp;</p>

Óńir ekononomıkasyna aıtarlyqtaı úles qosýǵa qaýqarly jobalar qatarynda «JNRAY Group» kompanııasynyń tigin fabrıkasy, «Borte Engineering» kompanııasynyń tamaq ónerkásibine arnalǵan óndiristik tehnıkalyq jabdyqtar shyǵarý fabrıkasy men «Bórte mılka» kompanııasynyń saýyn sıyr basyn 400 basqa, sút zaýytynyń qýattylyǵyn táýligine 10 tonnaǵa ulǵaıtý jobalary bar.

Badam eldi mekeninde ashylǵan «JNRAY Group» JShS-ń tigin fabrıkasy táýligine 500 dana ónim alýǵa qaýqarly. Onyń jalpy quny – 1 mıllıard 300 mıllıon teńgeni qurap otyr. Búginde fabrıka ónimderi oblys kóleminde ǵana emes, respýblıkaǵa da tanylyp úlgergen. Jobalar tolyǵymen iske asqan jaǵdaıda óńirde sút óńdeý salasy artyp, ónim kólemi de ulǵaıa túspek. Al, tigin fabrıkasyna degen tapsyrys kólemi de kóbeıedi dep kútilýde.

Al, Reseı jáne Italııa elderimen birlesip qolǵa alynǵan «Borte Engineering» kompanııasynyń tamaq ónerkásibine arnalǵan óndiristik tehnıkalyq jabdyqtar shyǵarý fabrıkasynyń ónimderi alys-jaqyn shetelderge eksporttalyp jatyr. 25 adamdy turaqty jumyspen qamtyp otyrǵan nysannyń jalpy quny – 1 mıllıard 100 mln teńgeni quraıdy. 

Budan bólek, 2024 jyldyń sońyna deıin quny 6,9 mıllıard teńgege, 354 jańa jumys ornymen 7 ınvestıtsııalyq jobany iske qosý josparlanyp otyr. Olardyń ishinde «Central Asia Aluminum» kompanııasy alıýmınıı buıymdaryn óndirý jobasy, «Dala Construction.kz» kompanııasynyń qabyrǵalarǵa, edenge jáne tóbege arnalǵan jylý oqshaýlaǵysh materıal (keramzıt) óndirý jobasy, «Anuar Company» kompanııasynyń qysh zaýyty bar. Sondaı-aq «Batyr Beton» kompanııasynyń temir beton buıymdaryn jáne asfalt shyǵarý jobasy, «AMG Park» kompanııasynyń balalarǵa arnalǵan oıyn alańshalaryn jınaý jobasy, «KAZDEZGROUP» kompanııasynyń zalasyzdandyrý ónimderin óndirý jobasy, «Steel Frame» kompanııasynyń metall ónimderin óndirý jobasy iske qosylmaq.