Túrkistan oblysynyń keı aýdandarynda sel júretin qaýipti aımaqtarǵa turǵyn úı salynyp ketken

<p>TÚRKІSTAN. KAZINFORM &ndash; Sý tasqynyn aldyný alý máseleleri oblys ákimi Darhan Satybaldynyń tóraǵalyǵymen ótken apparat otyrysynda talqylandy.</p>

Túrkistan oblysy Tótenshe jaǵdaılar departamentiniń bastyǵy Asqar Tóleshev ótken aıda taýdaǵy jınalǵan qar qorynyń kólemi normadan tómen ekendigin jetkizdi. Degenmen, «Qazgıdromettiń» RMK-nyń aqpan aıyna jasalǵan boljamynda oblystyń barlyq aımaǵynda túsetin jaýyn-shashyn kólemi normadan joǵary bolatyndyǵy kórsetilgen.

Búginde departament mamandary ózender men sý qoımalarǵa kúndelikti monıtorıng júrgizýde. Oblysta 42 sý qoıma bar. Olardyń tolýy 40-45 paıyzdy quraıdy. Al «Shardara» sý qoımasy men «Kóksaraı» sý rettegishinde tasqyn sýdy qabyldaýǵa shamamen 2,8 mlrd. tekshe metr kóleminde bos qor bar. Mamandardyń aıtýynsha jaǵdaı turaqty, ári qaýipsiz. 

Sonymen qatar, oblys aýmaǵynda 149 ózen, 31 sý qoıma, 2 tabıǵı kól, barlyǵy 182 sý nysany bar. Sý qorǵaý aımaqtary men beldeýlerinde 34190 turǵyn úı ornalasqan. Qazirgi tańda alańdaýshylyq týdyryp otyrǵan úılerdi tótenshe jaǵdaılar departamenti men aýdan ákimdikteri qatań baqylaýda ustaýy qajet. Laı kóshkinine qarsy daıyndyqta baqylaýǵa alynýy tıis. 

Foto: Túrkistan oblysy ákimdigi

Jumyldyrý daıarlyǵy, aýmaqtyq qorǵanys jáne azamattyq qorǵaý basqarmasynyń basshysy Sanjar Búrlibaevtyń aıtýynsha keıbir aýdandarda aryq-atyzdar men kanaldar tazartylmaǵan. Tólebı aýdanynda sel bolý qaýipi bar aımaqtarda kempıngter men turǵyn úılerdiń qurylys jumystary júrgizilgeni anyqtaldy. Osyndaı jaǵdaılar Qazyǵurt pen Túlkibas aýdandarynda bolýy múmkin degen basqarma basshysy jol talǵamaıtyn, sazda júre alatyn tehnıkanyń jetispeıtinin atap ótti.
Jıynda oblys ákimi Darhan Satybaldy jaýaptylarǵa mańyzdy máselerge beı-jaı qaramaýdy tapsyrdy.

«Jaýapty basqarmalar, aýdan, qala ákimderi Tótenshe jaǵdaı departamentimen birlesip, qaýipsizdik sharalaryn únemi pysyqtap otyrsyn. Ózen-kólder men sý nysandarynyń jaı-kúıi turaqty baqylaýǵa alynýy tıis. Turǵyndardyń qaýipsizdigin saqtaý – basty mindet. Sý tasqynyna qarsy jospardaǵy is-sharalar tolyq oryndalýy tıis», – dedi Darhan Satybaldy.

Aıta keteıik, jyl saıyn oblys aýmaǵynda «Kóktem» respýblıkalyq komandalyq oqý-jattyǵýy ótkizilip, azamattyq qorǵaý qyzmetteriniń kúshteri men quraldarynyń daıyndyǵy pysyqtalady. 8-9 aqpan kúnderi «Kóktem-2024» oqý jattyǵýy Báıdibek aýdanynda praktıkalyq turǵyda ótkizildi. Oqý-jattyǵýǵa barlyq azamattyq qorǵaý qyzmetteri jumyldyryldy.