Túrkistan oblysynyń ár aýdanynda zootehnıkter jumys isteıtin bolady

<p>TÚRKІSTAN. KAZINFORM- Túrkistan oblysynyń ákimi Darhan Satybaldynyń qoldaýymen alǵash ret zootehnık mamandyǵyn jańǵyrtý maqsatynda tıisti jumystar qolǵa alyndy. Oblys ákiminiń tapsyrmasymen óńirdegi 4 aýdanǵa zootehnık mamandary bekitilgen bolatyn. Alǵash ret qolǵa alynyp otyrǵan bul is sátti júzege assa, aldaǵy ýaqytta oblystyń barlyq aýdan, qalalalarynda veterınarııa salasyn zootehnık mamandarymen tolyqtyrý josparlanyp otyr. Olar mal basynyń kóbeıýi men ónimdigligin qadaǵalaıdy.</p>

«Veterınarııalyq qyzmet» memlekettik kommýnaldyq kásiporyny Báıdibek aýdandyq fılıalynyń zootehnıgi Baqytjan Kerimjanov atalǵan mamandyqtyń mańyzdylyǵyna toqtalyp, júrgizilip jatqan jumystar týraly aıtyp berdi.

«Kópten beri bizdiń ańsap júrgen jumys qaıta ornyna kele bastady. Mal sharýashylyǵyn kásip etken turǵyndardyń barlyǵy bul istiń qolǵa alǵanyna rızashylyǵyn bildirip jatyr. Onyń bastamashysy bolǵan oblys ákimi Darhan Satybaldyǵa rahmet. Aqpan aıynda osy qyzmetke taǵaıyndaldym. Osy mindetke kirisken boıda aýdan kóleminde 4 ret semınar ótkizdim. Sodan beri aýyl sharýalarymen birlesip jumys istep jatyrmyz. Zootehnık – sharýalar isin ilgeriletýge naǵyz kerek maman», – dedi zootehnık. 

Bıyl Túrkistan obysyndaǵy 4 aýdanda zootehnık mamandyǵy ashyldy. Qazirgi ýaqytta mamandar Báıdibek, Saryaǵash, Saıram, Otyrar aýdandarynda jumys istep jatyr. Olar sharýa qojalyqtaryn aralap, semınarlar ótkizý jumystaryn qolǵa aldy. Tehnık-uryqtandyrýshylar mal ónimderin óndirý tehnologııasyn jáne jergilikti jerdiń tabıǵı-ekonomıkalyq jaǵdaıyn jetik meńgergen zootehnık mamandarynyń súıemeldeýimen 3 aılyq oqý kýrstarynan dáris alyp, memlekettik tirkeýden ótýde. Sharýalar maldy asyldandyrýdyń qyr-syryn úırenip, mal basyn kóbeıtý, qoldan uryqtandyrý tásilderin jetik meńgerip jatyr. 

Osy baǵytta talaı jyldan beri jumys istep kele jatqan ujymnyń biri Báıdibek aýdanynyń Myńbulaq okrýgine qarasty Mádenıet eldi mekenindegi «Ádilet» sharýa qojalyǵy. 2002 jyly qurylǵan qojalyq asyl tuqtymdy mal sharýashylyǵyn damytýda «qoldan uryqtandyrý» tásilimen jumys júrgizip keledi. Sharýashylyqtaǵy asyl tuqymdy tólderge suranys joǵary. 
Zootehnıkalyq jumystardyń qaıta jandanyp kele jatqany sharýalardyń qoldaýyna ıe bolýda.

Aıta keteıik, Túrkistan oblysy – agrarlyq óńir. Mal basy jáne ónimdiligi ortasha eseppen 5 paıyzǵa ósýde. Et eksporty boıynsha oblys respýblıkada aldyńǵy orynda. Eksportqa jóneltilgen iri qara mal etiniń úlesi 85 paıyzdy, usaq mal – 60 paıyzdy quraıdy.