Túrkistan oblysynyń 11 synyp oqýshysy álemdik 21 ýnıversıtetten shaqyrtý aldy
Arys qalasynyń turǵyny, 11 synyp oqýshysy Shapaǵat Seıilhanǵa álemdik ýnıversıtetter nazaryn aýdaryp otyr. Tipti, arnaıy shaqyrtýlar jiberip, bilim granttaryn usynǵan. Olardyń qatarynda Case Western University, Chicago State University, Clark University, Colarado State University, California State University sekildi oqý oryndary bar.
Al, arystyq túlektiń tańdaýy Chıkago ýnıversıtetine túsken. Sebebi, ondaǵy reıtıng álemdik deńgeıde joǵary baǵalanady. Sondaı-aq, eń jaqsy zertteý ýnıversıtetteri de AQSh-ta ornalasqan.
«Boston ýnıversıtetinde Gúlnaz Jolshy esimdi jerlesim oqyp júr. Sol ápkemnen kóptegen málimetter alyp otyramyn. Ol da maǵan qajetti sabaqtardy, kitaptardy jiberip, jol kórsetip turady. Meıramkúl Ismaılova, Dına Tájibaeva esimdi aǵylshyn tilinen sabaq beretin ustazdarym bilim berip, aǵylshynsha erkin sóıleýdi úıretýde» - deıdi ol.
Álemdik joǵarǵy oqý oryndarynyń nazaryn aýdarýǵa Shapaǵattyń jazǵan rezıýmesi sebep bolǵan. Onda, ol óziniń ómiri men talaby týraly erekshe sıpattap, jazba qaldyrypty. Álemniń 28 ýnıversıtetine jazǵan hattarynan 21 jaýap kelgen. Barshasy jas túlekti oqýǵa shaqyrǵan. Al, 7 joǵary oqý orny áli jaýap bermepti.
«Tamyz aıynyń sońynda IELTS tapsyryp 6,5 ball jınadym. Sodan «common app» baǵdarlamasy arqyly álemdik joǵary oqý oryndaryna hat jazdym. Arada 3-4 aı ótkende oqýǵa shaqyrtýlar kele bastady. Qatty qýandym. Áke-sheshem de, ustazdarym da qatty qýandy. Shet elde bilim alýǵa ata-anam qarsy emes. Degenmen, áli naqty kelisimin bermedi. Endi qańtar aıynda granttyń tolyq nátıjesi shyǵady. Sol kezde qaı ýnıversıttette oqıtynym belgili bolady» - deıdi ol.
Shapaǵat bıyl mektep bitiredi. Jergilikti jerdegi Vladımır Komarov atyndaǵy №8 mekteptiń 11 synybynda oqıtyn ol bala kúninen aǵylshyn tili pánin jaqsy oqyǵan. Tipti 9 synypta júrgende-aq IELTS synaǵyn tapsyramyn degen armany bolypty. Sodan tildik qoryn molaıtyp, qosymsha bilim alǵan. Іzdengen. Internet arqyly bilimin jetildirgen.
«Zamandastaryma árdaıym kómekteskim keledi. Shetelde oqyǵysy keletin túlekter qazirden bastan halyqaralyq olımpıadalarǵa qatysyp, IELTS-tan bólek SAT synaǵyna daıyndalýy qajet» - deıdi Shapaǵat.
Jas túlektiń tańdap otyrǵan mamandyǵy halyqaralyq qatynastar salasymen tikeleı baılanysty. Arystyq qyz shetelde júrip, dıplomatııalyq iskerlik salasynda qyzmet etkisi keledi.
«Kópshilik shetelde tek «úzdikter» bilim alady dep oılaıdy. Men «Altyn» belgige de, «Úzdik» attestatqa da úmitker emespin. Degenmen aǵylshyn tili pánin jaqsy kóremin. Barlyq armanym shetelde elshilik qyzmetter atqarý» - deıdi ol.