Túrkistan oblysyndaǵy trassalarǵa blokbeketter qoıylyp jatyr

<p>Túrkistan oblysynda qar qursaýynda qalǵan 31 jolaýshyǵa kómek kórsetildi, dep habarlaıdy <a href="Kazinform" target="_blank" rel="noopener">Kazinform</a>.</p>

Kún raıynyń kúrt sýytýyna baılanysty Túrkistan oblysyndaǵy joldar jabylýda. Qazirgi kezde «Almaty-Tashkent-Termez» avtojolynyń 601 shaqyrymyndaǵy Shaqpaq aýylynyń mańy men 654 shaqyrymyndaǵy Mashat asýynda 2 blokbeket ornatyldy. Sondaı-aq Báıdibek aýdany aýmaǵyndaǵy oblystyq mańyzy bar Shaıan-Aǵybet, Shaıan-Aqbastaý, Shaıan-Myńbulaq, Shaıan-Birlik-Keńestóbe avtojoldary jabylyp, qosymsha 4 blokbeket qoıyldy.

Óńirde tártip saqshylary men tótenshe jaǵdaı mamandary kúsheıtilgen rejımde jumys istep jatyr. Jol boıynda adasyp qalǵan jáne avtokólikteri qarda turalap qalǵan jolaýshylarǵa kómektesýde. Máselen, Respýblıkalyq mańyzy bar «Almaty-Tashkent-Termez» avtojolynyń 635 shaqyrymyndaǵy Qarashyq aýyly mańynda 6 jolaýshymen Túrkistannan Almatyǵa shyqqan «Toyota Alphard» kóligi jáne 5 jolaýshysy bar 3 jeńil avtokólik qar qursaýynan shyǵaryldy.

Báıdibek aýdany aýmaǵynda jol ortasynda turyp qalǵan 17 júrgizýshige kómek kórsetilip, 6 kólik keri qaıtaryldy.

«Túrkistan oblysy polıtsııa departamentiniń basshysy Murat Qabdenovtiń tapsyrmasymen 11 jeltoqsannan bastap mańyzy bar joldarda patrýldeý men aýa-raıynyń qubylýyna baılanysty jolaýshylarǵa kómek kórsetý jumystaryn táýlik boıy júrgizilýde. Saqshylar turǵyndarǵa aýa-raıynyń qolaısyz bolýyna baılanysty alys jolǵa shyqpaý kerektigin eskertedi» - dedi Túrkistan oblysy polıtsııa departamentiniń baspasóz qyzmetiniń basshysy Gúlnar Ábdijapparova.

Aıta keteıik, budan aldyn qatty aıazdan Túrkistan oblysynda joldar jabylyp, mektepter onlaınǵa kóshkenin jazǵan bolatynbyz.

Sondaı-aq, Túrkistan oblysyndaǵy trassalarda 4 jylytý beketi jumys istep tur.