Túrkistan oblysyndaǵy «Samǵaý» ońaltý ortalyǵy 150-den astam bos jumys ornyn usyndy
Jármeńkege oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Nurjan Nurashov, Saýran aýdany ákiminiń orynbasary Baqytjan Býkebaev qatysyp, jumyssyz júrgen azamattarǵa turaqty jumysqa ornalasýlaryna sáttilik tiledi.
Ortalyqtyń ashylýyna baılanysty medıtsınalyq, arnaýly áleýmettik-pedagogıkalyq, psıhologııalyq, eńbek, mádenı, áleýmettik-turmystyq, sharýashylyq qyzmet kórsetý personaldary jumysqa qabyldanady. 200 oryndyq nysan 18 jastan asqan múgedektigi bar adamdarǵa jartylaı statsıonarlyq jaǵdaıda arnaýly áleýmettik qyzmet kórsetýge arnalǵan.
Basqarma basshysynyń orynbasary Nurjan Nurashovtyń aıtýynsha qyzmetkerler quramy iriktelip, resmı ashylýy qazan aıyna josparlanýda.
Arnaıy mamandar bos jumys oryndary jármeńkesine Saýran aýdany, Kentaý jáne Túrkistan qalalarynan kelgen turǵyndardy qabyldap, keńes berdi. Oblystyq «Eńbek mobıldiligi ortalyǵy» KMM dırektory Abzal Kazankapov jármeńkege 250-den astam adam qatysqanyn jetkizdi.
Búginde, Túrkistan oblysynda 99 myńnan astam múgedektigi bar adam esepte tur. Onyń ishinde 84 myńnan astamy - eresekter bolsa, 15 myńy - balalar. Arnaýly áleýmettik qyzmet alýshy sanatyndaǵylar sany - 34 370 adam. Oblystyq basqarmaǵa qarasty statsıonarlyq jaǵdaıdaǵy, jartylaı statsıonarlyq jaǵdaıdaǵy, sondaı-aq beıimdeý jáne saýyqtyrý, jumyspen qamtý baǵytynda jalpy 14 mekeme jumys isteıdi. Qazirgi tańda Saýran aýdanynyń Oranǵaı aýylynda 50 oryndyq psıhonevrologııalyq aýytqýy bar múgedek balalarǵa arnaýly áleýmettik qyzmetter kórsetý ortalyǵynyń qurylysy júrgizilýde. Ǵımaratty 2025 jyldyń І toqsanynda paıdalanýǵa tapsyrý kózdelgen.
Aıta keteıik, budan buryn Túrkistan oblysynda ońaltý ortalyqtary salynyp jatqanyn jazǵan bolatynbyz.