Túrkistan oblysyndaǵy kolledjder jumysshy mamandyqtaryn daıarlaýǵa basymdyq beredi
Joldaý júktegen mindetterdi talqylaý maqsatynda Túrkistan oblysy ákiminiń orynbasary Beısenbaı Tájibaevtyń tóraǵalyǵymen májilis ótti. Oǵan Oblystyq bilim basqarmasynyń jaýapty tulǵalary, tehnıkalyq jáne kásiptik bilim berý mekemeleriniń dırektorlary qatysty.
«Biz búgin atqarylǵan jumystardy pysyqtap, máselelerdi ashyq ortaǵa salý úshin jınaldyq. Problemalardyń sheshý joldaryn birge qarastyramyz. Sizderdiń usynystaryńyz eskerýsiz qalmaıdy. Buǵan deıin ınfraqurylymdy retke keltirý, qaýipsizdikti kúsheıtý sharalaryn júıeledik. Zań buzýshylyq áreketterge tosqaýyl qoıdyq. Oblys kolledjerine bólingen 15 500 granttyń ıgiligin jastar kórýi úshin nasıhatyn kúsheıtip, oqýǵa qabyldaýdy iske asyrdyq. Endigi kezekte strategııalyq baǵyttan aınymaı, jumysshy mamanyqtardyń mártebesin arttyrýǵa basymdyq berip, jańashyl ári tyń bastamalarmen júzege asyrýymyz qajet. Oqý baǵdarlamasynda zamanaýı tehnologııalardy ıntegratsııalaý ózekti. ІT, robototehnıka, jasandy ıntellekt sekildi baǵyttardy engizgen jón. Kolledj basshylyǵy óndiris oryndaryn seriktestikke tartý kerek. Bul stýdentterge óndiristik tájirıbe jınaqtaýǵa múmkindik berip ǵana qoımaı, jumys berýshilerdiń talaptaryna sáıkes maman daıarlaýǵa yqpal jasaıdy. Bilim berý júıesinde kásipkerlik qabiletterdi shyńdaýǵa kóńil bólip, startap mádenıetin qalyptastyrý arqyly eńbek naryǵynda suranysqa ıe kadrlarǵa beıimdeı alamyz. Ásirese aýdan, qala ákimderiniń ınvestıtsııalyq jobalaryna qajetti kadrlar daıarlaý mańyzdy. Qaıtalanatyn mamandyqtardy qysqartyp, jańa mamandyqtardy ashýdy qolǵa alaıyq. Sizderdiń usynymdaryńyzdy kútemin. Sonymen qatar stýdentterdi aǵylshyn tilin meńgerýge baǵyttańyzdar. Kreatıvti jańa ınnovatsııalyq jobalardy jandandyrýǵa tıispiz», – dedi Beısenbaı Tájibaev.
Oblystyq bilim basqarmasynyń orynbasarlary kolledjerdegi bilim berý júıesi, júrgizilgen zerdeleýler jáne problemalyq máseleler, jylý maýsymyna daıyndyq jumystary jáne ózge máseleler jaıly sóz sóıledi.
Jıynda oblys ákiminiń orynbasary basqarma basshylyǵy men dırektorlarǵa birqatar tapsyrma júktedi. Jumysshy mamandyqtar jylyna oraı is-sharalar josparyn ázirleý, qarjylandyrý jáne ınvestorlardyń jobalaryn zań aıasynda qarastyrý, kolledj túlekterin jumysqa ornalastyrý, kolledjder bazasynda ІT ortalyqtardy ashý, WorldSkills chempıonatyna daıyndyqty pysyqtaý, tárbıe jumystaryn kúsheıtý, qajetti qural-jabdyqtarmen qamtý, beınekameralardy jedel basqarý ortalyǵyna qosý mindetteri sapaly oryndalady. Májilis qatysýshylary Saýran aýdanyndaǵy óndiristik parkine baryp, jobalarmen tanysty. Ondaǵy mamandarmen tildesip, pikir almasty.
Aıta keteıik, Túrkistan oblysynda 50 kolledj bar. Onyń 28-i memlekettik bolsa, 22-si jekemenshik. Oqý oryndarynda 75 mamandyq boıynsha 45 myńnan astam stýdent bilim alýda. Kolledj qyzmetin baǵalaý 12 krıterıı, al reıtıngi 3 baǵytqa sáıkes turaqty júrgiziledi. PISA-2023 halyqaralyq zertteý nátıjesinde 2 kolledjdiń baly anyqtalsa, 2024-2025 oqý jylynda 4 kolledj qatysady. Osy jyly dırektorlar men ádiskerler Frantsııa elinde, Qazaqstanda Aqmola oblysynda tájirıbeden ótti. Aldaǵy ýaqytta Qytaı jáne Ózbekstan elderinde issaparlary josparlanýda.