Túrkistan oblysynda júk kóligimen qalyńdyq alyp kelgen júrgizýshiler jaýapqa tartyldy

<p>TÚRKІSTAN. KAZINFORM &ndash; Oqıǵa Qazyǵurt aýylynda bolǵan. Jol erejesin óreskel buzǵan júrgizýshilerdiń kólikteri aıypturaqqa qoıyldy.&nbsp;</p>

Tártip saqshylary kortej jasap júrgen memlekettik nómiri joq kólikterdi anyqtaǵan. Sondaı-aq olardyń arasynda arnaıy jaryq shamdaryn jaǵyp júrgen júk kóligi de bolǵan.

Polıtsııa qyzmetkerleri jol erejesin óreskel buzǵan júrgizýshilerdi toqtatyp, olardyń kóligin aıypturaqqa qoıǵan. Onyń ishinde «VOLVO FH» júk kóliginiń júrgizýshisine avarııalyq jaǵdaı týǵyzyp, baǵdarshamnyń tyıym salynǵan sıgnalyna qaramaı ótkeni jáne memlekettik tirkeý nómiri bolmaǵany úshin, jol belgilerimen nemese joldyń júrý bóligindegi tańbalarmen kórsetilgen talaptardy saqtamaǵany, tıisti ruqsatsyz qaıta jabdyqtalǵan kólik quralyn basqarǵany úshin 5 hattama toltyryldy.

Sonymen qatar jasaǵan quqyq buzýshylyqtaryna saı «LADA 21144» markaly kólik júrgizýshisine úsh, al «LADA GRANTA FL» kóliginiń júrgizýshisine eki ákimshilik hattama toltyryldy. 

«Quqyq buzýshylar toı kortejin uıymdastyryp, kelin ákele jatqany belgili boldy. Quqyq buzýshylar kinálaryn moıyndap, aldaǵy ýaqytta qaıtalamaıtyndyqtaryn jetkizdi», - delingen Túrkistan oblysy polıtsııa departamentiniń baspasóz qyzmeti usynǵan aqparatta.